د افغانستان کورنیو چارو وزارت ویاند قاري سعید خوستي له شمشاد سره په خبرو کې ومنله، چې د امارت په لیکو کې داسې افراد او اشخاص داخل شوي دي، چې خلک زوروي او د ولسونو په منځ کې ښه نوم نه لري.
خوستی زیاتوي:« د اسلامي امارت لېکو ته داسې کسان راننوتي دي، چې په تېر کې ښه مخینه نه لري، ولس یې زورولی او په ولس کې ښه مخینه نه لري. اسلامي امارت یو پاک او سپېڅلی صف دی او د دې صف ټول مجاهدین داسې دي، چې په سیمه کې ښه نوم اوښه سابقه لري اوس موږ داسې راپورونه لرو، چې داسې کسان صف ته را ننوتي، چې ښه نوم نه لري.»
اخوا د سیاسي چارو یو شمېر شنوکي وايي، د امارت په لیکو کې د ناوړه کسانو موجودیت له طالبانو سره دښمني او د رامنځ ته شوي نوي فرصت د ننګوونې مانا ده او ټینګار کوي، چې سمدستي دې د امارت له لیکو واېستل شي.
د سیاسي چارو شنونکی حکمت الله حکمت وايي:«د طالبانو له لیکو څخه هغه ناوړه افرادو اشخاص، چې په حقیقت کې له دوی سره د دښمنۍ د پالیسۍ د تطبیق لپاره ورننوتي دي تصفیه کول یې اړتیا ده. نن خلک ترې شکایت لري، د خلکو کورونو ته بې اجازې ورننوتل، د خلکو کورونو غصب کول او بالاخره د طالب په نامه باندې د خلکو ذهنیت خراب کول، دا په حقیقت کې له اوسني نظام او رامنځ ته شوي اوسني فرصت سره دښمني ده، باید طالبان لاس په کار شي. دغه افراد تصفیه کړي، مجازات یې کړي او اجازه ورنه کړي، چې د طالبانو له ادرسه ولسونه وزوروي او رامنځ ته شوی فرصت وننګوي.»
په ورته مهال کورنیو چارو وزارت د دغو کسانو د پېژندلو او له خپلو لیکو د اېستلو په تړاو د جدي اقدام خبره کوي او زیاتوي، چې په دې تړاو ملي دفاع، کورنیو چارو وزارت او استخباراتو ریاست ګډ کمېسیون رامنځ ته کړی او ژر به خپلې چارې پیل کړي.
د کورنیو چارو وزارت ویاند قاري سعید خوستی وايي:« د دې لپاره اسلامي امارت یوځانګړی کمیسیون ټاکلی دی، چې درېیو امنیتي اورګانونو، کورنیو چارو او ملي دفاع وزارت او د استخباراتو له ریاست، چې له ټولو نه په کې استازي موجود دي او سبا او بله ورځ به خپل موجودیت اعلان کړي او خپل ادرسونه او شمیرې به هم اعلان کړي او هغه کسان، چې دخلکو د ازار او اذیت لامل کېږي او ښه مخینه نه لري د اسلامي امارت له لیکو به واېستل شي.»
