د پاکستان دفاع وزیر په خپلو وروستیو څرګندونو کې له دې هېواده د افغان کډوالو د جبري ایستلو پرېکړه پر ځای بللې.
خواجه اصف پر خپله اېکس پاڼه لیکلي، پاکستان په تېرو څو لسیزو کې افغان کډوالو ته په خپله خاوره کې ځای او د کار موکه ورکړې وه، خو په خبره یې دغو کډوالو تل د مننې پر ځای د پاکستان د ګټو خلاف عمل کړی.
نوموړي په کوردننه پر دې پرېکړې نیوکه کوونکي کسان سخت ننګولي او د پاکستان دوښمنان يې بللي دي.
هغه زیاته کړې: « کله چې تاسو کره پناغوښتونکي ستاسې د کور لپاره زنده آباد نه وايي، ستاسې بیرغ ته سپکاوی کوي، د هغوی وروڼه ستاسو د کور د ساتونکو وینه تویوي، د هغوی هېواد زموږ د دوښمنانو پټنځای وي، په کومه خاوره کې چې د هغوی دوه نسله ځوان شوي وي، په کومه خاوره کې چې خدای هغوی ته روزي ورکړې وي او له دې سره سره دغه پناغوښتونکي او مېلمانه د دې خاورې خیر غوښتونکي نه وي؛ نو دغه مېلمانه باید خپل کور ته ولېږل شي. هغه پاکستانیان چې کور ته د هغوی له لېږلو سره مخالف دي، دوی په اصل کې د پاکستان ترڅنګ نه بلکې د پاکستان د دوښمنانو ترڅنګ ولاړ دي. هېڅوک باید په دې برخه کې دوه زړي نه وي.»
د کډوالو او راستنېدونکو چارو وزارت په پاکستان کې د افغان کډوالو پر وړاندې روان وضعیت او زور زیاتی د کډوالو له نړیوالو نورمونو سره په ښکاره ټکر کې بولي.
دغه وزارت یو ځل بیا له پاکستان غوښتي چې هلته د افغان کډوالو پر وړاندې چلن انساني کړي او د کډوالو د جبري ایستلو لړۍ ودروي.
د کډوالو او راستنېدونکو چارو وزارت ویاند عبدالمطلب حقاني وايي: « پاکستان مېشت افغانان په نا امنیو کې لاس نه لري. د کډوالو د ایستلو پرېکړه ډېرو محدودو کسانو کړې او دا پرېکړه نه یوازې خپله د پاکستان د قوانینو هم خلاف ده، بلکې هغه ادارې هم په جریان کې نه دي اچول شوې چې د کډوالو په برخه کې کار کوي.»
ګڼو لوړ پوړو پاکستاني چارواکو له دې هېواده په جبري توګه د افغان کډوالو له ایستلو سره مخالفت ښودلی.
د مارچ له ۳۱مې نېټې وروسته د خیبر پښتونخوا اعلی وزیر علي امین ګنډاپور د خپل ایالت پولیسو ته امر کړی چې د دغو کډوالو پر وړاندې له زور زیاتي کار وا نه خلي.
خو افغان کډوالو ته په پاکستان کې د پاتېدا لپاره د مارچ د ۳۱مې نېټې له رسېدا سره سم، پاکستان له خپلې خاورې د اې.سي.سي کارټ لرونکو او ناقانونه کډوالو د ايستلو لړۍ په شدت پیل کړه.
د راپورونو له مخې، له تېرو اوو ورځو راهیسې یې شاوخوا ۹ زره افغان کډوالو د پاکستان له بېلابېلو سیمو افغانستان ته ستانه کړي دي.
د سیاسي چارو شنونکی محمد سلیم پیګیر وايي: « د پاکستان دفاع وزیر دا هېره کړې چې د هر افغان مهاجر په سر یې د ورځې پنځه ډالره اخیستل. خواجه اصف هېره کړې چې د شوروي اتحاد د ۱۴ کلن یرغل پرمهال، میلیاردونه ډالر پاکستان ته ورکړل شول.»
د سیاسي چارو شنونکي د افغان کډوالو پر وړاندې د خواجه اصف د تندې لهجې کارول او د کړو نسبي ښېګڼې بېرته یادول د کډوالۍ او ګاونډیتوب اصولو خلاف ګڼي.
د دوی پر باور، که له یوې خوا پاکستان په تېرو شاوخوا ۴۰ کالو کې افغان کډوالو ته پناه ورکړې، له بلې خوا یې د کډوالو په نوم له نړیوالې ټولنې میلیاردونه ډالر هم ترلاسه او خپل اقتصاد یې پرې رغولی دی.
د سیاسي چارو شنونکی معین ګل څمکنی وايي: « د پاکستان حکومت په ډېرو برخو کې له مهاجرو ګټه واخیسته او میلیاردونه ډالر یې ترلاسه کړل، حتا پاکستان خپلې اټومي وسلې هم د مهاجرو په برکت ترلاسه کړې. اوس چې په نړیوال نظام کې بدلون راغلی او په افغانستان کې داسې حکومت راغلی چې په ټول افغانستان واکمن دی، هیله ده چې افغانان په خپله خوښه او عزت سره کور ته راشي. د بدبختۍ خبره دا ده چې ولسونه د افغان کډوالو شتمني لوټي، خو نه یوازې د پاکستان حکومت د دې کار مخه نه نیسي، بلکې افغان کډوالو ته وايي چې یوازې له څادر سره راغلي وئ او بېرته به یوازې له څادر سره ځئ.»
دا په داسې حال کې ده چې له پاکستانه د افغان کډوالو جبري ایستلو نه یوازې په افغانستان کې ګڼې اندېښنې او نیوکې راپارولې دي، بلکې پر نړیواله کچه هم دغه پرېکړه ننګول شوې ده.
د بښنې نړیوال سازمان د اپرېل پر ۶ مه نېټه افغان کډوالو ته د ورکړي مهلت د غځولو کمپاین پیل کړ او له پاکستانه یې وغوښتل چې له افغان کډوالو سره د انساني چلن له مخې عمل وکړي.
