د افغان سولې لپاره د امریکا بهرنیو چارو وزارت پخوانی ځانګړی استازی زلمی خلیل زاد وايي،په افغانستان کې د امریکا ماموریت پای ته نه دی رسېدلی او په خبره یې لا ډېر مسوولیتونه لري،چې ترسر یې کړي.
خلیل زاد دافغانستان د کنګل شویو پیسو پر خلاصیدو ټینګار کړی اوله نړیوالې ټولنې یې غوښتي،چې په دغه هېواد کې د احتمالي پیښیدونکي ناورین مخه ونیسي.
خلیل زاد زیاته کړې:« دافغانستان کنګل شوې پیسې دې ازادې شي او د هر ډول احتمالي بحران مخه دې ونیول شي. په افغانستان کې د امریکا کار لا ختم نه دی او لاهم زیات مسولیتونه لري. طالبان هم باید د نړیوالې ټولنې شرایط ومني او نړیوال دې هم اجازه نه ورکوي،چې په دغه هېواد کې جګړې دوام وکړي او د یو بل ناورین لامل شي او له افغانسان سره باید مرستې پیل شي.»
د خلیلزاد له دغو څرګندونو داسې انګېرل کېږي،چې ګني امریکا غواړي،له اسلامي امارت سره په همغږۍ له داعش سره د جګړې لپاره بېرته راوګرځي.
د سیاسي چارو یو شمېر شنونکي وايي، امریکا لاهم داسې فکر کوي،چې افغانستان یې په غیر مستقیم ډول کنټرول کې دی.
شنونکی عزیز معارج وايي:« د خلیل زاد وروستۍ څرګندونې دوه عمده معنی لري،یو دا چې امریکا تر اوسه افغانستان نه دی پریښی،یعني پر افغانستان باندې خپل کنټرول لري، یا په مستقیم یا غیر مستقیمه توګه باندې او دویمه مانا یې دا دی،چې د امریکا ماموریت په دې نه دی ختم شوی،چې کیدای شي یا له طالبانو سره یا له طالبانو سره پر همغږۍ له داعش سره کومې جګړې بیا دلته را شي، خو په ټوله کې د افغانستان دولت ته ملت او سیمې هېوادونو ته دا یوه ډېره لویه خبر تیا دهوچې دوی باید خبر واوسي او هرڅوک دې خپل تدابیر ونیسي.»
خوځنې نور بیا په دې اند دي،چې امریکا غواړي،له افغانستان سره یو نوی باب پرانیزي او د اسلامي امارت د نړیوال مشروعیت د ترلاسه کولو په صورت کې له افغانستان سره بشري او اقتصادي مرستې زیات کړي.
شنونکي طارق فرهادي وايي:« طالبان باید هڅه وکړي،چې نړیوال مشروعیت ترلاسه کړي او په هغه صورت کې امریکا کولای شي،چې بشري کمک چې کوي،زیات یې وکړي، دیپلوماتیک کمک وکړي،که هم په افغانستان کې نشته شاید یوه ورځ بېرته راشي او همدا راز اقتصادي کمک وکړي. په نړیوال بانک کې او د پیسو په وجهي صندق کې د امریکا رایه زیاته مهمه ده،چې د افغانستان پیسې ازادې شي.»
د افغانستان نوی نظام تر اوسه پورې د هېڅ هېواد له لوري پر رسمیت نه دی پیژندل شوی،خو د امریکا په ګډون ځېنو هېوادونو له افغانستان سره د څه باندې یو میلیارد ډالرو په ارزښت د بشري مرستو اعلان کړی، چې ځېنې رارسیدلې هم دي.
