د افغان سولې لپاره د امریکا پخواني ځانګړي استازي زلمي خلیلزاد د افغانستان پر درېیو ولایتونو د پاکستان پوځي رژیم د چهارشنبې شپې بریدونه غندلي او ویلي یې دي چې په دې بریدونو کې د ماشومانو په ګډون، ملکي وګړو ته مرګ ژوبله اوښتې.
خلیلزاد پر اېکس پاڼه په دې اړه زیاته کړې: « پاکستان بیا ځل پر افغانستان برید کړی. د راپورونو له مخې، په دې برید کې د ماشومانو په ګډون ګڼ ملکي وګړي وژل شوي دي. زه دا برید غندم، لکه څرنګه مې چې د پاکستان هغه تېر بریدونه غندلي وو چې ملکي وګړو ته په کې مرګ ژوبله اوښتې وه.»
زلمي خلیلزاد زیاته کړې چې پر ملکي وګړو بریدونه ستونزې نه حلوي او نه هم هغو تورونو ته د حل لارې پيدا کوي چې افغانستان او پاکستان یې پریوبل پورې کوي. نوموړي په دې اړه ویلي: « دا ډول تاوتریخوالی به د دواړو هېوادونو ترمنځ ستونزې حل نه کړي. یعنې هغه ادعاوې چې پاکستان وايي افغانستان د پاکستاني طالبانو تحریک(ټيټيپي) ته پناه ورکړې او افغانستان بیا وايي چې اسلام اباد د داعش خراسان څانګې ته پناه ورکړې او ترې ملاتړ کوي.»
د افغانستان سولې لپاره د امریکا پخواني ځانګړي استازي دغه راز ویلي، د افغانستان او پاکستان ستونزه د خبرو له لارې حل کېدای شي. د هغه په خبره، هغه څه چې اړتیا ده دا دي چې د خبرو له لارې توافق وشي او په کې دواړه لوري ژمنه وکړي چې اجازه نه ورکوي د یوه هېواد خاوره د بل په ضد وکارول شي.
د خلیلزاد په اند، دا ډول خبرې او ژمنې باید د یوه باروي درېیمګړي له خوا وڅارل شي.
د هغه په خبره، د پاکستان اوسنۍ تګلاره ناکامه شوې او اړتیا ده چې جدي خبرو او ډېپلوماسۍ ته لومړیتوب ورکړي.
