د افغان سولې لپاره د امریکا ځانګړی استازی زلمی خلیلزاد ویلي، قطر کې له طالبانو سره خبرو کې مهم پرمختګونه شوي، خو لا وروستۍ هوکړه نه ده شوې.
خلیلزاد پر خپل ټوېټر لیکلي، تر اوسه کومه وروستۍ هوکړه نه ده شوې او د وروستۍ هوکړې لپاره اړینه ده چې د افغانانو ترمنځ مخامخ خبرې وشي او اوربند اعلان شي.
خلیلزاد ویلي، چې لا ځینې موضوعات پاتې دي چې باید بحث پرې وشي.
تر دې وړاندې رویټرز خبري اژانس د طالب سرچینو له قوله لیکلي و، چې دوحه کې هوکړه شوې چې امریکایي ځواکونه به په اتلس میاشتو کې له افغانستانه ووځي.
ارګ کې ځینو باوري سرچینو رسنیو ته ویلي، له افغان حکومت سره له مشورې پرته د امریکا او طالب استازو ترمنځ هېڅ هوکړه نه کېږي.
د قطر ناستې په تړاو د طالبانو څرګندونې
قطر کې د طالبانو او امریکا ترمنځ خبرې تیره ورځ مازدیګر مهال پای ته ورسېدې.
طالب ویاند ذبیح الله مجاهد وایي، قطر کې یې په تیرو شپږ ورځو کې له امریکایي استازو سره د بهرنیو ځواکونو پر وتلو او نورو مهمو مسایلو بحث کړی چې پرمختګ هم شوی.
د مجاهد په خبره، د دوی او امریکا ترمنځ ځینې خبرې نه دي حل شوي چې راتلونکي کې به یې په اړه نورې ورته غونډې جوړې شي.
ذبیح الله مجاهد هغه راپورونه رد کړل چې ګنې طالبانو له امریکا سره په اوربند خبرې کړي او له افغان حکومت سره په مخامخ خبرو راضي شوي.
طالبان وایي، په خبرو کې یې روښان دریځ دا و چې، تر څو له افغانستان د بهرنیو ځواکونو د وتلو موضوع نه وي حل شوې، په نورو برخو کې پرمختګ امکان نه لري.
د امریکا خوشبیني
امریکا په افغانستان کې د سولې په ټینګښت کې جدي ده.
د امریکا بهرنیو چارو وزیر مایک پامپیو په خپل ټوېټر لیکلي، امریکا هوډ لري چې افغانستان یو ځل بیا د ترهګرو لپاره په ځاله بدل نه شي.
پامپیو ویلي، د افغان حکومت او نورو دخیلو خواوو سره په ګډه کار کوي چې افغانستان کې سوله، د افغانانو حاکمیت او خپلواکي پیاوړې شي.
هغه همداراز د افغان سولې لپاره د خلیلزاد هڅې ستایلي او ویلي یې دي چې، خلیلزاد د ښه پرمختګونو په تړاو راپور ورکړی دی.
بل پلو د پاکستان پوځ ادعا کړې، د طالبانو او امریکایانو ترمنځ خبرې دوی برابرې کړي دي.
د پاکستان د پوځ ویاند اصف غفور ویلي، دوی خپل مسوولیت ادا کړ او اوس د امریکا او پاکستان د اړیکو د ښه کېدو هیله لري.
