Skip to content
د افغانستان اسلامي امارت نړۍ ته د ایمن الظواهري په سپیناوي کې تر اوسه پورې غلی دی او د سیمې هغه هېوادونه،چې د افغانستان له اړخه یې د القاعده او داعش وېره څرګندوله،هغوی هم الظواهري په تړاو غلي دي.
امریکا د الظواهري له وژلو څلور ویشت ساعته وروسته د برید له یو اړخ پرده پورته کړه او سم لاسي د ملامتۍ ګوته حقاني شبکې ته نیول شوې ده.
د امریکا دامنیت شورا سلاکار جک سلیوان او د افغان سولې لپاره د امریکامتحده ایالتو پخواني استازي زلمي خلیلزاد ویلي، حقاني د ایمن الظواهري په اړه پوهېده،خو دوی سره یې په وژنه کې ځینو طالبانو ښايي مرسته کړې وي.
خلیلزاد زیاته کړې:« داسې امکان شته دی،چې ځینو طالب مشرانو دا مالومات درلودل،خو زه ډاډمن نه یم،چې ټوله رهبري خبره اوسي، داسې ښکاري،چې حقاني ډله چې د طالبانو مهمه برخه ده،په دې خبر وو. دا احتمال هم شته دی، چې ځینې طالبان له دې کار ناخوښ وو او دایې د دوحې د هوکړې نقض باله او ویلی شم،چې هغوی له موږ سره د موقیعت په نښه کولو کې مرسته کړې اوسي.»
اخوا د امریکا متحده ایالتو د ملي امنیت ستراتیژیکو اړیکو همغږی کوونکی جان کربي بیا وايي، اوس هم طالبان د دوی تر څار لاندې دي او په دې پوهیږي،چې طالبان څوک ساتي او له چا ملاتړ کوي.
په ورته وخت کې کربي وايي، اسلامي امارت هڅه وکړه،چې له برید وروسته شواهد پټ وساتي.
کربي زیاته کړه:«موږ طالبانو ته دا روښانه کړه،چې موږ پوهېږو، چې دوی څه وکړل او موږ پوهېږو،چې دوی له چا ساتنه کوي؟ موږ ځینې هغو ګامونو باندې هم پوهېږو،چې دوی هڅه وکړه تر حملې وروسته شواهد پټ کړي، نو دوی زموږ له څار پناه نه دي.»
له دې سره د افغانستان لپاره د اروپایي ټولنې استازی توماس نیکلاسن،چې تاشکند ناسته کې یې له طالبانو سره ګډون کړی وایي،هغه شکونه چې د اسلامي امارت په تړاو موجود وو،هغه لا زیات پیاوړي شول.
د نیکلاسن پر وینا، اسلامي امارت د تاشکند په کنفرانس کې هڅه کوله،چې نړیوالو ته قناعت ورکړي.
هغه زیاته کړه:« تېره اونۍ د تاشکند په ناسته کې موږ له طالبانو واوریدل،چې د دې هڅه یې کوله،چې نړۍ ته قناعت ورکړي،چې د افغان ولس ملاتړ کوي او پر ټوله خاوره یې کنټرول شته دی. هغوی پر خپلو هغو ژمنو هم ټینګار درلود،چې افغانستان به د ترهګرو پر پټن ځای بدل نه شي،خو په کابل کې د ایمن الظواهري وژل کېدو د طالبانو په تړاو د خلکو شکونه لا زیات او پیاوړي کړل.»
په کابل کې د ایمنالظواهري له وژلو راپدیخوا د افغانستان اسلاميامارت پر نړیواله کچه له مخالفت سره مخ دی.
باوري سرچینې وایي، د افغانستان اسلامي امارت د یوه مناسب غبرګون لپاره د برید په اړه تحقیقات او په خپلو کې سلا مشورې پیل کړي دي.
اوس به ولیدل شي،چې په دې اړه اسلامي امارت څه کولی شي،خو نړیوال باور یې خورا ټیټې کچې ته رالوېدلی دی.
