د افغانستان د سولې لپاره د امریکا د بهرنیو چارو وزارت ځانګړي استازي زلمي خلیلزاد ویلي واشنګټن تمه لري چې روسیه او چین به د افغانستان د سولې له پروسې سره په مرسته کې مهم رول ولوبوي.
د روسیې د بهرنیو چارو وزارت ویلي چې په مسکو کې د جمعې درې اړخيزې غونډې هدف د افغانستان د سولې لپاره د نړیوالې اجماع رامنځته کول و.
زلمي خلیلزاد پرون تر غونډې وروسته، د روسیې له خبري اژانس انټرفکس سره په مرکه کې د افغانستان د سولې په اړه د درېیو هېوادونو ناسته مهمه بللې ده.
خلیلزاد ویلي، “موږ هیله لرو چې روسیه به له خپل نفوذه کار واخلي او په هغو مواردو کې به چې خبرې ورباندې وشوې، لکه د تشدد کمېدل، د ترورېزم پرضد د مبارزې میکانیزمونه او ضمانتونه، تر موافقې وروسته
د افغانستان وضعیت او بین الافغاني خبرې او ډیالوګ او د لارې د یوې نقشې جوړولو کې به مرسته وکړي.”
په مسکو کې د درې اړخیزې غونډې د اعلامیې متن د روسیې د بهرنیو چارو وزارت پر وېبپاڼه خپور شوی دی.
غونډه کې د افغانستان لپاره د چین، روسیې او امریکا ځانګړو استازو ګډون کړی و.
د درېیو هېوادونو په ګډه اعلامیه کې د افغانستان ملي حاکمیت ته په درناوي له طالبانو غوښتل شوي چې د سولې خبرو ته حاضر شي.
د امریکا بهرنیو چارو وزارت اعلامیه کې ویلي، (( روسیه، چین او امریکا افغان طالبان هڅوي چې له افغان حکومت او نورو افغانانو سره ژر تر ژره خبرو ته کېني.))
له دې سره ټاکل شوې چې د چین، امریکا او روسیې درېیمه درې اړخیزه ناسته په چین کې ترسره شي.
د امریکا بهرنیو چارو وزارت زیاته کړې، چې درې خواوې هوکړې ته رسېدلي چې سلا مشورې به زیاتوي او همداراز د بیجینګ کې د درېیمې درې اړخیزې ناسته لپاره چمتووالی نیسي.
