د افغان سولې لپاره د امریکا ځانګړي استازي زلمي خلیلزاد ویلي، له طالبانو سره د مذاکراتو لپاره د یوه اغېزمن ټیم پر جوړولو کار روان دی.
د افغان سولې لپاره د امریکا د بهرنیو چارو وزارت ځانګړي استازي زلمي خلیلزاد په تازه څرګندونو کې ویلي، دی په کابل کې دی او د بین الافغاني خبرو د پيل لپاره د یوه اغېزمن او پياوړي ټیم پر جوړولو کار روان دی.
ولسمشر محمد اشرف غنې له خلیلزاد غوښتې چې څو ورځي کابل کې پاتي شې.
ټاکل شوې خلیلزاد د کابل له سفر وروسته دوحې ته لاړ شي او د خبرو په دوام له طالبانو سره وګوري.
اندونیزیا کې د افغان سولې په تړاو درې اړخیزه ناسته
ټاکل شوې راتلونکې میاشت په اندونیزیا کې د افغان سولې په تړاو درې اړخیزه ناسته جوړه شي.
په دغه دویمه درې اړخیزه ناسته کې به د افغانستان، پاکستان او اندونیزیا د اسلام دین علماء برخه واخلي او د اګست میاشتې په ۲۶ مه او ۲۷ مه جوړه شي.
د افغانستان د ملي امنیت شورا مرستیال عتیق الله نوشیر، دغه راز کنفرانسونه په هیواد کې د تفاهم د رامنځته کېدو او د سولې د راوستو لامل بولي.
د اسیا پسېفیک او افریقا لپاره د اندونیزیا د بهرنیو چارو وزارت مسئول ډیسرا پارکایا ویلي، هیواد یې د سولې داسې پروسې ته ژمن دی، چې د افغانانو په مشرۍ او د افغانانو لخوا وي.
ډیسرا پارکایا ویلي، هیواد یې په پام کې لري چې ډېر ژر د افغان مېرمنو یو کنفرانس هم وروبولي، چې په کې به د سولې، پراختیا، د بې وزلۍ د له منځه وړلو او داسې نورو موضوعاتو خبرې وشي.
له دې سره د ازبکستان د بهرنیو چارو وزارت هم ويلي، د راتلونکې بین الافغاني خبرو کوربتوب ته چمتو دی.
د روسیې د انټرفاکس خبري اژانس د خبر له مخې، د هغې اعلامیې له مخې چې د دې وزارت لخوا خپره شوې ویل شوي چې، د بین الافغاني خبرو بل پړاو ته د لازمو شرایطو د برابرولو لپاره کار کوي او سمرقند به د دغو خبرو کوربه وي.
د دغو خبرو د ترسره کېدو مشخصه نېټه نه ده ښودل شوې، خو ویل شوي چې په راتلونکې اګسټ میاشت کې به دغه غونډه جوړه شي.
د بهرنیو چارو وزارت هیله ښودلې چې دغه غونډه به بریالۍ وي.
تر دې مخکې مسکو دوه ځلې او قطر یو ځل د دا ډول غونډو کوربه ول.
