د افغانستان د سولې لپاره د امریکا ځانګړي استازي زلمي خلیلزاد ویلي، یوازې د افغانستان له جګړې د ځان خلاصولو لپاره هڅې نه کوي او نه هم یوازې د ځواکونو د وتلو لپاره تړون کوي، بلکې په وینا یې د سولې یو جامع تړون غواړي او له افغانستان سره د اوږدمهاله اړیکو او شراکت غوښتونکي دي.
خلیلزاد په واشنګټن کې ویلي، د دغې جګړې د پای ته رسېدو لپاره د افغانانو ترمنځ د سولې لپاره خبرې کوي چې ښځې به هم په کې ناستې وي.
خلیلزاد له طالبانو سره د خبرو وروستی پړاو تر ټولو اغېزمن او ګټور بللی او هیله یې ښودلې چې دغه خبرې به د سېپټمبر تر لومړۍ نېټې اغېزمنه پایله ورکړي.
له دې سره طالبانو ویلي، امریکایي ځواکونه د نړیوال تضمین پر اساس له افغانستان وځي.
قطر کې د طالبانو د سیاسي دفتر مخیکني مشر عباس ستانکزي ویلي، د اروپایي ټولنې ترڅنګ، د سیمې هیوادونه او جاپان هم په دې برخه کې مهم رول لري او که دغه موضوع ژر وروستۍ شي، نو د سولې په برخه کې به پرمختګ وشي.
ستانکزي له یوه جاپاني ټلوېزیون سره په مرکه کې ویلي، که نړیوال تضمین کوونکي هیوادونه خپل رول ادا کړي، نو امریکا چمتو ده چې خپل ځواکونه له افغانستان بهر کړي.
عباس ستانکزي ویلي، له افغانستان د بهرنیو ځواکونو د وتلو لپاره د نړیوالې ټولنې ترڅنګ د سیمې هیوادونو تضمین اړین دی.
عباس ستانکزي ویلي، له امریکایي لوري سره د ستونزې له حل وروسته چمتو دي چې له افغان حکومت او سیاسیونو سره هم مخامخ خبرې وکړي او په مهمو مسایلو بحث وکړي.
بل پلو په امریکا کې افغان سفیرې رویا رحماني ویلي، د سولې په تړاو چې هره هوکړه کېږي اړتیا لري چې یو پیاوړی مرکزي حکومت یې عملي کړي.
په امریکا کې د افغانستان لومړنۍ ښځینه سفیرې رویا رحماني د سولې په تړاو هیله لري، خو ویلي یې دي چې، تر اوسه د افغان حکومت او طالبانو ترمنځ خبرې نه دي پیل شوي.
رحماني، د سولې د پروسې د پرمخ بیولو پر وړاندې د سختو خبرو وړاندوینه کړې او زیاته کړې یې ده چې د طالبانو او امریکا ترمنځ هره موافقه اړتیا لري چې یو پیاوړی مرکزي حکومت یې عملي کړي.
په ټوله کې دفتري ښځې اندېښنه لري چې طالبان به یې غوښتنې ونه مني او د دوی حقوق به تر پښو لاندې کړي.
خو طالبان وایي، د ښځو او اقلیتونو حقوق په اسلام کې مالوم دي او دوی ورته پوره درناوی لري.
