امریکا وایي له طالبانو سره د شوې هوکړې پاتې مراحل به شرایطو ته په کتو عملي کېږي.
د افغان سولې لپاره د امریکا د بهرنیو چارو وزارت ځانګړي استازي زلمي خلیلزاد په ټوېټ پیغامونو کې په سمنګانو کې د طالبانو موټربم برید غندلی دی او په خبره یې دا د هوکړې خلاف کړنه ده.
دده په خبره د طالبانو دغه ډول کړنې به هغه کړۍ پیاوړې کړې چې د سولې مخالفې دي او همدا راز د تاوتریخوالي کمول د سولې هوکړې مهم شرط دی.
خلیلزاد ویلي له دې وروسته به شرایطو ته په کتو د سولې هوکړې پاتې برخې عملي کېږي.
نوموړي ویلي د زندانیانو د خلاصون، تاوتریخوالي د کمولو او بین الافغاني خبرو د پیلولو لپاره به خپل فشارونه ډېر کړي.
هغه همدا راز ویلي چې د سولې هوکړې لومړۍ ۱۳۵ ورځې پوره شوې دي او امریکا پوره هڅه کوي چې دغه هوکړه عملي شي.
دده په خبره سرتېري کم شوي دي، له نظامي اډو به وځي او د سولې هوکړې پاتې مرحلې به عملي کوي.
له دې سره د روسیې د بهرنیو چارو وزارت ویلي، د روسیې د بهرنیو چارو وزیر سرګي لاوروف له خپل امریکایي سیال مایک پمپیو سره د افغانستان په تړاو ټیلیفوني خبرې کړې دي.
. دوی د افغانستان د سولې او همدا راز ټاکنو اوامنیت وضعیت په اړه خبرې کړې دي. روسیې ویلي دوی په افغانستان کې د سولې او ثبات د راتګ ملاتړ کوي او په دې برخه کې همکارۍ ته تیار دي.
بلخوا مایک پمپیو هم ویلي چې مسکو او واشنګټن باید په سیمه کې د تاوتریخوالی او بې ثباتیو له کمولو سره همکاري وکړي او د افغانستان په ګډون په سوریه او نورو هېوادونو کې د جګړو په پای ته رسولو کې رغنده رول ولوبوي.
