اوس چې د سولې برخلیک له ناڅرګند وضعیت سره مخ دی، د امریکا کانګرس د افغان سولې لپاره د دې هېواد استازی زلمی خلیلزاد ورغوښتی وه. د خلیلزاد د خبرو محور د بهرنیو ځواکونو له وتلو وروسته د افغانستان په وضعیت، طالبانو سره په خبرو او په افغان سوله کې د پاکستان په رول ورټول و.
په کانګرس کې جمهوریپال استازي چې له افغانستان څخه د امریکايي ځواکونو پر وتلو نیوکه لري، خبرداری یې ورکړ چې طالبان به د دوحې په تړون ونه درېږي.
د امریکا د کانګرس جمهوریپال استازي مایکل مکانل وویل: ((تقریباً داسې ښکاري چې طالبان د ځواکونو له وتلو وروسته هڅه کوي دا هېواد ونیسي او د سپټمبر ۱۱ تر پېښو پخواني وخت ته یې ورسوي. ))
خو د سنا غړو سره خبرو کې زلمي خلیلزاد دا یوه تېروتنه وبلله چې ګني طالبان به افغان حکومت چپه او کابل به ونیسي.
د خلیلزاد په وینا، د نړیوالو ځواکونو تر وتلو وروسته طالبان جګړې او د جګړې له لارې واک ته د رسېدو لپاره هېڅ دلیل نه لري او په وینا یې طالبان یوه داسې سیاسي هوکړه غواړي چې له مخې یې هغوی ته په نړیواله کچه مشروعیت ورکړل شي او د امریکا له خوا پرې لګول شوي بندیزونه هم لیرې شي.
خلیلزاد یو ځل بیا خبرداری ورکړ، که طالبان د جګړې له لارې واک ته د رسېدو هڅه وکړي نو له ناوړه پایلو سره به مخ شي.
خلیلزاد د کانګرس غړو ته د پاکستان په رول هم خبرې وکړې. هغه وویل، امریکا په پاکستاني مشرانو فشار اچوي چې پر طالبانو له خپل نفوذ کار واخلي چې تاوتریخوالی کم کړي. د خلیلزاد په خبره په افغانستان کې جګړه د پاکستان په ګټه نه ده.
د افغان سولې لپاره د امریکا ځانګړي استازي زلمي خلیلزاد وویل: ((زه ګومان کوم چې پاکستان په دې پوهېږي چې په افغانستان کې اوږدمهاله جګړه د پاکستان په ګټه نه ده. کله چې خبره په دیپلوماتیکه حل لاره کې د پاکستان د رول په اړه کېږي نو پاکستان په دې برخه کې یو ځانګړی مسؤلیت لري.))
د خلیلزاد په وینا، پاکستاني مشرانو ویلي چې د افغانستان په اړه یې خپل لید لوری بدل کړی او کابل سره په تړون کې یې د امارت راتګ سره مخالفت کړی او نظامي حل یې رد کړی.
