د افغان سولې لپاره د امریکا پخواني ځانګړي استازي زلمي خلیلزاد د پاکستان د دفاع وزیر خواجه محمد اصف وروستیو څرګندونو ته په غبرګون کې ویلي، د کره مالوماتو پر اساس د داعش ډلې په څېر خطرناکې ترهګرې ډلې لاهم په پاکستان کې موجودې دي.
خلیلزاد پر خپله اېکس پاڼه لیکلي، د داعش خراسان څانګه په پاکستان کې پټنځایونه لري او دا هېواد باید په خپله خاوره کې د داعش او نورو وسله والو ډلو پر وړاندې اقدامات وکړي.
هغه زیاته کړې:« له بده مرغه داسې معتبر راپورونه وجود لري چې د پاکستان په خاوره کې د مهمو او خطرناکو ترهګرو ډلو موجودیت تایيدوي. د بېلګې په توګه، په پاکستان کې د داعش خراسان څانګه روزنیز مرکزونه لري. راپورونه وايي چې د مارچ په نیمايي کې د بلوچستان مستونګ ولسوالۍ د بولان سیند ته نږدې غرونو کې د بلوڅ ازادي غوښتونکو له خوا د داعش پر یوه روزنیز مرکز برید وشو چې د ترکیې، هند، تاجیکستان او ازبېکستان اتباعو په ګډون د داعش ډلې شاوخوا ۳۰ تنه وسله وال په کې ووژل شول او مرکز یې ویجاړ شو. که دغه راپورونه رېښتیا وي، نو دا بیا د پاکستان له استخباراتي ادارو پټ نه شي پاتې کېدای.»
د افغانستان لپاره د امریکا پخواني ځانګړي استازي همدا رنګه ویلي، دا موضوع نه یوازې اسلام اباد ته ګواښ پېښوي بلکې په خبره یې د پاکستان ګاونډ او سیمې ته هم یو ګواښ دی.
خلیلزاد په دې اړه وايي:« اسلام آباد باید د داعش او نورو وسله والو ډلو د حضور او هلته د فعالیت مساله جدي حل کړي، ځکه دا ستونزه نه یوازې د پاکستان لپاره بلکې د ټولې سیمې او نړیوالې ټولنې لپاره جدي خطر دی. دا به اوس ټولو ته روښانه وي چې له ترهګرۍ سره د تاکتیکي اهدافو لپاره لوبه کول یوه تباه کوونکې تګلاره ده او ناوړه پایلې لري.»
د خلیلزاد له دغو څرګندونو دوه ورځې وړاندې د پاکستان دفاع وزیر خواجه اصف په لومړي ځل د وسله والو او ترهګرو ډلو په روزلو اعتراف وکړ.
نوموړي له یوې بریټانوۍ رسنۍ سره خبرو کې ومنله چې پاکستان له درېیو لسیزو راهیسې د غرب په غوښتنه او خوښه د وسله والو او ترهګرو ډلو ملاتړ کړی.
له دې سره هم مهاله، د سیاسي چارو کارپوهان هم ادعا کوي چې اسلام اباد له تېرو څو لسېزو راهیسې د خپلو ګټو او سټراټيژیکو اهدافو لپاره ترهګرې ډلې روزلې دي.
د سیاسي چارو کارپوه شهزاده مسعود وايي: « افغانانو له ډېرې پخوا راهیسې دا خبره کوله چې د ترهګرو مرکزونه او روزنځایونه چېرته دي. دا چې اوس د پاکستان برحاله دفاع وزیر او دغه راز د امریکا پخوانی استازی زلمی خلیزاد هم دا خبره کوي چې د ترهګرو پټنځایونه په پاکستان کې دي او روزنه ورکول کېږي، نړیواله ټولنه باید په دې برخه کې جدي ګامونه پورته کړي، ترڅو په سیمه کې تل پاتې امنیت او دایمي ثبات رامنځته شي. نړۍ باید په دې اړه نور بې تفاوته پاتې نه شي.»
دغه راز، پخواني ډېپلوماټان بیا وایي، د خپلو پخوانیو سیاستونو له امله تر پوښتنې لاندې دی او په خبره یې که د ملګرو ملتونو امنیت شورا په پاکستان کې د ترهګرو ډلو د مخنیوي لپاره په دې هېواد فشارونه وضع نه کړي، سیمې او نړۍ ته ګواښ پېښېدلی شي.
پخوانی ډېپلوماټ عزیز معارج وايي: « دا مساله به بیا تر امریکا، نیویارک او اروپا پورې رسېږي، نو په کار ده چې سر له اوسه د نړیوالو اصولو پر بنسټ او د نړیوالو قضايي ادارو پر بنیاد یې مخنیوی وشي.»
زلمي خلیلزاد دا څرګندونې داسې مهال کړې چې د روان ۲۰۲۵ زېږدیز کال د جنورۍ پر ۲۲مه د اسلامي امارت امنیتي او تصفیوي کمیسیون کلني راپور کې ویلي وو چې پاکستان په بلوچستان او قبایلو سیمو کې داعش جنګیالي روزي او د داعش هغه جنګیالي چې په سوریه او نورو هېوادونو کې پاتې دي، د کراچۍ او اسلام اباد له هوايي ډګرونو بلوچستان او خیبرپښتونخوا ته په چورلکو کې لېږدوي او د خپلو ګټو لپاره روزنه ورکوي.
