امریکا او طالبانو تیره میاشت د قطر پلازمېنه دوحه کې هوکړه لاسلیک کړه چې له مخې به یې، ۵ زره طالب بندیان خوشې کېږي او له هغې وروسته به بین الافغاني مذاکرات پیليږي.
افغانستان کې د سولې لپاره د امریکا ځانګړی استازی زلمي خلیلزاد پر خپل ټویټر لیکلي، د بندیانو د خوشې کولو وخت رارسیدلی دی.
افغانستان لپاره د امریکا ځانګړي استازي ویلي، متحده ایالات غواړي چې د دوی او طالبانو د توافق سره سم، د بندیانو خلاصون ژر تر ژره پیل شي.
زلمي خلیلزاد ویلي، که څه هم طالبانو او افغان دولت ژمنه کړې چې داسې به کوي، خو په وینا یې تر اوسه هیڅ بندیان ندي خوشې شوي.
هغه لیکلي، طالبان ژمنه کوي چې خوشې شوي بندیان به د سولې په هوکړه کې شوې ژمنې مني او د جګړې ډګر ته به نه ستنيږي.
خو ولسمشر محمد اشرف غني د لوړې مراسمو وروسته یو فرمان صادر کړ چې له مخې یې ۱۵۰۰ طالب بندیان باید د کب یا حوت د میاشتې له ۲۴ راپدېخوا هره ورځ ۱۰۰ تنه خوشې شوي وای او د حکومت او طالبانو ترمنځ د مذاکراتو د پرمختګ په صورت کې ۳۵۰۰ طالب بندیان هم په تدریج خوشې کیدل.
طالبانو بیا د غني طرحه رد کړه او خبرداری یې ورکړ چې تر هغې به بین الافغاني مذاکرات پیل نه کړي څو ۵۰۰۰ طالب بندیان یو ځلي نه وي خوشې شوي.
د افغان مشرانو ترمنځ د جوړجاړي غوښتنه
د افغان سولې لپاره د امریکا ځانګړي استازي زلمي خلیلزاد یو ځل بیا پر افغان سیاسیونو غږ کړی چې خپلمنځي اختلافونه ختم او جوړ جاړی وکړي.
خلیلزاد پر خپل ټویتر لیکلي، اوس یې وخت دی چې افغانان جوړجاړی وکړي، خپلمنځي اختلافات لرې کړي او هغه سیاسي کړکیچ هوار کړي چې د ټولټاکنو او د عبدالله عبدالله او غني د لوړې مراسمو څخه رامنځته شوی.
هغه لیکلي، دغه کړکیچ، امنیت ته زیان رسوي او په باور یې کرونا وایروس مرګونی ګواښ رامخې ته کړی او له افغانانو غواړي چې خپل هېواد او خپلو خلکو ته لمړیتوب ورکړي.
د ټاکنو کمېسون ولسمشر محمد اشرف غني د ۹۸ کال تولټاکنو ګټونکی اعلان کړ، خو عبدالله عبدالله یې نه مني او ځان بریالی ګڼي.
دواړو په یوه ورځ د لوړې مراسم هم ترسره کړل.
