د افغان سولې لپاره د امریکا ځانګړي استازي زلمي خلیلزاد د پاکستان د هغې اعلامیې هرکلی کړی چې په کې یې ویلي، د افغانستان په داخلي چارو کې لاسوهنه نه کوي.
د افغان سولې لپاره د امریکا ځانګړي استازي زلمي خلیلزاد پر ټوېټر لیکلي چې، له سولې پروسې د پاکستان او د سیمې نورو هېوادونو له همکاریو هرکلی کوي.
خلیلزاد ویلي، یوازې افغانان د دې حق لري چې افغانستان کې د سولې له ټینګښت وروسته ژوند وکړي.
له دې سره خلیلزاد د اروپايي ټولنې له استازو سره لیدلي او د افغان سولې پروسې په تړاو یې ورسره خبرې کړي دي.
خلیلزاد ویلي، د ولسمشریزو ټاکنو په تړاو د اروپايي ټولنې اندېښنې مني خو وايي، د سولې خبرې باید داسې شکل ترسره شي چې ګواکې په مخکې هېڅ ټاکنې نشته او په وینا یې ټاکنې
باید داسې ترسره شي چې ګواکې هېڅ د سولې خبرې نشته، خو دواړو ته باید لومړیتوب ورکړل شي.
زلمي خلیلزاد ويلي، هدف یې دا دی چې له طالبانو سره داسې موافقې ته ورسېږي چې د امریکا او ناټو د دوو لسیزو قربانیو ارزښت ولري.
زلمي خلیلزاد په بروکسل کې د ناټو له سرمنشي ینس ستولتنبرګ سره له کتنې وروسته په خپل ټویټر لیکلي، افغانستان کې د ناټو او امریکا پوځیان اوږه په اوږه جنګېږي او د دوی شریکه
موخه دا ده چې د سولې داسې موافقې ته ورسېږي چې د جګړې د لسیزو قربانیو ارزښت ولري.
بل پلو د امریکا د بهرنیو چارو وزیر مایک پامپیو، افغانستان کې د امریکايي پوځیانو د شمېر کمېدا له طالبانو سره د امریکا له خبرو سره تړلي بللي.
پامپیو ویلي، امریکا هڅه کوي چې افغانستان کې د شخړې ټولې خواوې قانع کړي چې سره یو ځای شي او د جګړې پر پای ته رسېدو موافقه وکړي.
