واک ته د سرپرست حکومت له رسېدو څه کم ۴ کاله تېرېږي، په دې موده کې د کابل ښاروالۍ د آبادۍ، ښېرازۍ او په ښار کې د ګڼې ګوڼې د مخنيوي لپاره يو لړ پراختيايي پروژې پلې کړې دي.
عام خلک د يادو پراختيايي پروژو له پلي کېدو خوښ دي او وايي، دغه پروژې د ګڼې ګوڼې مخنيوي ترڅنګ خلکو ته د کاري فرصتونو په رامنځته کولو کې هم مهمې دي.
دوی له ښاروالۍ غوښتنه کوي چې په راتلونکي کې د يادو پروژو د تطبيق چارې په غور او له معيارونو سره سمې ترسره کړي.
د کابل ښار یو تن اوسېدونکی روح الله وايي: « موږ ډېر خوښ یو، دا چې خلکو ته یې د کار زمینه برابره کړې او د ښار ګڼه ګوڼه یې کمه کړې ده.»
د کابل ښار یو بل اوسېدونکی سیداکبر وايي: « د کابل ښار نفوس ډېر خو سړکونه یې کم دي. دا ښه ګام دی چې ښاروالي پراختیايی پروژې پلې کوي، خو باید خپلې چارې په چټکۍ ترسره کړي، ترڅو د خلکو د تکلیف سبب نه شي.»
د کابل ښار یو بل اوسېدونکی محبالرحمان وايي: « موږ په تېرو درېیو کالو کې د کابل ښاروالۍ له خوا ډېر ښه کارونه لرل، نوي سړکونه جوړېږي او دا خلکو ته د سهولت راتلو سبب کېږي او ورسره بيروبار کمېږي.»
د کابل ښار ځينې نور اوسېدونکي بیا د ښار پاکولو په برخه کې د ښاروالۍ له لږې پاملرنې شکايت کوي. د دوی په خبره، له ګڼې ګوڼې په ډکو سيمو کې د کثافت دانيو اېښودل د ناروغيو زېږنده دي او له مسوولینو غواړي چې د ښاري پراختيا په پام کې نيولو سره دې د ښار پاکۍ او نظافت ته جدي پاملرنه وکړي.
د کابل ښار اوسېدونکی محمد اجمل وايي: « کله چې شمال وي، د کثافاتو بد بوی هرې خواته وړي. کثافت دانۍ له کثافاتو ډکې وي، خو ژر یې نه لېږدوي؛ د دې ځای ټول دوکانداران او لاس پلورونکي له دې بوی په تکلیف دي.»
د کابل ښار یو بل اوسېدونکی باسه ګل وايي: « له کابل ښاروالۍ غوښتنه کوم دا کثافات دانۍ له هغو ځایونو ټولې کړي چې د خلکو بیروبار زیات دی.»
کابل ښاروالي د ښار پاکولو لپاره د کافي بوديجې له ځانګړې کېدو خبر ورکوي او وايي، تل يې د ښار پاک ساتلو هڅې کړې دي.
د ښاروالۍ مسوولین له عامو خلکو هم غواړي چې د ښار پاکوالي لپاره دې کثافت او غځلې هر ځای نه بلکې په ځانګړو شویو ځايونو کې واچوي.
د کابل ښاروالۍ استازی نعمتالله بارکزی وايي: « د ښار پاکوالی هغه موضوع ده چې د کابل ښاروالي هر کال او هره ورځ پرې کار کوي. د ښار په داخل کې د تنظیف لپاره ځانګړی سیسټم موجود دی او ټول کارونه له ټاکلي مهالوېش سره سم پرمخ ځي، البته کابل ښاروالي د ښار د لا ښه تنظیف لپاره د ماشینرۍ پېرلو لپاره ځانګړې بودیجه په پام کې لري. موږ له ټولو ښاریانو هم غوښتنه کوو چې د ښار په پاکولو کې له موږ سره مرسته وکړي او خپل کثافات په هغو ځایونو کې واچوي چې د ښاروالۍ له خوا ورته ټاکل شوي دي. همدارنګه خلک باید له کانالونو او ویالو د کثافات دانیو په توګه کار وا نه خلي.»
د کابل ښاروالۍ د مالوماتو له مخې، ښاروالۍ په تېر ۱۴۰۳ لمریز کال کې۱۶۰ پروژې پلې کړې دي چې يو شمېر يې ګټې اخيستنې ته سپارل شوې او د پاتې هغو يې کارونه لاهم دوام لري.
