په افغانستان کې واک ته د اسلامي امارت له رسېدو کال پوره کیږي،خو لا یې هم له شپږم ټولګي پورته د نجونو پر مخ د ښوونځيو دروازې نه دي پرانېستل شوي.
عام افغانان وايي، نور له دې حالته ستړې دي او هر څومره چې ژر کېږي، باید نجونو ته د زده کړو مسلم حق ورکړل شي.
د کابل ښار یو تن اوسېدونکی وايي:«موږ وایو، ترڅو نجونو د زده کړو حق ورنه کړل شي، ښځو ته د کار حق ورنه کړل شي، دا هېواد نه جوړېږي. موږ باید ښوونځيو نجونو ولېږو. نجونو باید ښوونځيو ته ولاړې شي او مدرسو ته ولاړې شي. موږ ټول دا حق لرو. دا له طالبانو پورې اړه نه لري، د افغانستان خلکو پورې اړه لري.»
د کابل ښار یو بل اوسېدونکی بیا وايي:« په ټوله نړۍ کې د ښځو مخنیوی هېچ چا نه دی کړی. زموږ په ټولنه کې هم باید د دوی ( ښځو) مخنیوی ونه شي. انشاء الله زموږ مشرانو به هم په دې اړه فکر وکړي.زموږ هېله دا ده،چې ژر تر ژره نجونو ته اجازه ورکړي،چې ښوونځیو ته ولاړې شي.»
د نصیب هاشمي په نوم کس چې له میدان ښاره یې کابل ته د درملنې له پاره د نسايي ولادي ناروغان راوړي، وايي،سیمه کې يې د ښځينه ډاکټرانو نه شتون د دې لامل شوی دی، چې ناروغان کابل ته راوړي.
