په داسې حال کې چې د اسلامي امارت لوړ پوړی پلاوی د تاشکند پانګونې په څلورم نړیوال کنفرانس کې د ګډون په موخه د ازبېکستان پلازمېنې تاشکند ته تللی، د افغانستان سولې لپاره د امریکا پخواني ځانګړي استازي زلمي خلیلزاده ویلي، دا دواړه هېوادونه غواړي په خپلو کې اقتصادي اړیکې پراخه کړي.
ازبېکستان غواړي له افغانستان سره سوداګریزې او اقتصادي اړیکې پیاوړې کړې، زلمي خلیلزاد پر خپله اېکس پاڼه دغه جمله لیکلې او د ازبېکستان له ولسمشر سره یې د افغانستان اسلامي امارت د پلاوي لیدنې انځور هم خپور کړی دی.
خلیلزاد زیاته کړې:« ازبېکستان غواړي چې له افغانستان سره خپلې سوداګریزې او اقتصادي اړیکې پیاوړې کړي.»
د پانګونې څلورم نړیوال کنفرانس کې د ګډون لپاره تاشکند ته تللي افغان لوړ پوړي پلاوي کې د سوداګرۍ او صنعت وزارت سرپرست نورالدین عزیزي او د دولتي شرکتونو عمومي رییس هم شامل دي.
د سوداګرۍ او صنعت وزارت وايي، ازبېکستان د پانګونې نړیوال څلورم کنفرانس کې د ګډون رسمي بلنه ورکړې وه.
د سوداګرۍ او صنعت وزارت ویاند اخندزاده عبدالسلام جواد وايي: « له دې سفر موخه د تاشکند پانګونې په څلورم نړیوال کنفرانس کې ګډون او د دواړو هېوادونو ترمنځ د تېرو پرېکړو او ژمنو تعقیب دی. دا د سیمې پر کچه له سترو کنفرانسونو دی چې هر کال په یوه هېواد کې جوړېږي. د تاشکند په نړیوال کنفرانس کې د شاوخوا ۱۰۰ هېوادونو چارواکي د ولسمشرانو، لومړي وزیرانو او وزیرانو پر کچه ګډون کوي.»
د اقتصادي چارو شنونکي وايي، د سوداګرۍ په برخه کې د مرکزي آسیا ټول هېوادونه او په ځانګړې توګه ازبېکستان د افغانستان لپاره مهم دی او لازمه ده چې له دې هېواد سره اړیکې نورې هم پیاوړې او پراخې شي.
د دوی په خبره، اوس په اقتصادي او سوداګریزو برخو کې افغانستان ته د نړۍ پام ور اوښتی او سیمه ییز او نړیوال سوداګر لېواله دي چې افغانستان کې پانګونه وکړي.
د اقتصادي چارو شنونکی عبدالجبار ساپی وايي:« د ازبېکستان په تاشکند کې د پانګونې څلورم نړیوال کنفرانس یو له مهمو کنفرانسونو دی. په دې کنفرانس کې د اسلامي امارت د پلاوي او په ځانګړې توګه د صنعت او سوداګرۍ وزارت د سرپرست ګډون ډېر مهم دی. دا ګډون هم له اقتصادي، هم سیاسي او هم امنیتي پلوه ګټور دی. په دې کې به انشاالله ښې لاسته راوړنې ولرو؛ ځکه چې اوس د نړیوالو فکر افغانستان ته راګرځېدلی او غواړي دلته پر لویو او کوچنیو پروژو پانګونه وکړي.»
د اقتصادي چارو کارپوه نورالله عزیز وايي: « د تاشکند په نړیوال اقتصادي کنفرانس کې د افغانستان ګډون ډېر مهم دی. دا به افغانستان ته فرصت ورکړي چې له هغو ټولو هېوادونو سره د تجارت، ټرانزیټ او نویو پروژو د تطبیق لپاره اړیکې جوړې کړي چې په دې کنفرانس کې ګډون کوي. همدارنګه ترڅنګ یې د نړۍ په نورو هېوادونو کې د افغان تولیداتو لپاره بازارونه ولټوي. له ازبېکستان سره د افغانستان اقتصادي اړیکې ډېر ارزښت لري. په دې وروستیو کالو کې له دې هېواد سره د تجارت او اقتصادي اړیکو کچه په کافي اندازه پراخه شوې او ورځ تر بلې لا پسې پراخېږي.»
په ورته مهال، د ازبېکستان ولسمشر شوکت میرضیایف د تاشکند په څلورم نړیوال کنفرانس کې د وینا پرمهال له افغانستان سره پر تعامل ټینګار کړی او له اسلامي امارت سره یې د نړیوالې ټولنې رغند تعامل اړین بللی.
د تاشکند نړیوال کنفرانس له مهمو اقتصادي ناستو دی چې کال په کال دایریږي او د نږدې ۱۰۰ هېوادونو استازي د ولسمشرانو پر کچه په کې ګډون کوي.
