پاکستان له تېرو نږدې شپږو کالونو راهیسې له بېلابېلو لارو هڅه کړې چې په اسلامي امارت باندې هر اړخیز فشار راولي، ترڅو د دوی غیر مشروع سیاسي غوښتنو ته مثبت ځواب ووایي.
په دې موده کې اسلام اباد خپلو سیاسي موخو ته د رسېدو لپاره له کابل سره هر اړخیزې اړیکې زیانمنې کړې او ان په یاد هېواد کې یې مېشت افغان کډوال په زور او جبر را و ایستل.
تازه له یاد هېواده بیا افغانستان ته د ناامنۍ جوړولو په موخه په غیر قانوني لارو وسلې را لېږدول کېږي، خو د اسلامي امارت د امنیتي ځواکونو له لوري د فرضي کرښې په اوږدو کې سیمې تر بشپړ کنټرول لاندې دي او د نا امنۍ جوړولو هر ډول ګواښونه له منځه وړي.
تازه د ۲۰۱ خالد بن ولید قول اردو د کشف استخباراتو مسوولینو په خیتیځ زون کې د عملیاتو پر مهال ۷۴ میله سپکې او درنې وسلې نیولې دي.
د ۲۰۱ خالد بند ولید قول اردو ویاند وحید الله محمدي وايي: « موږ په ختیځ زون کې کشفي عملیات ترسره کړل چې په پایله کې یې ۷۴ میله سپکې او درنې وسلې، سلګونه فیره مهمات او نظامي تجهیزات نیولي دي. په دغو وسلو کې ځینې وسلې له پاکستان څخه افغانستان ته د ورانکارۍ په موخه راوړل کېدې چې زموږ ځواکونو ونیولې.»
له څه باندې دوو اوونیو راهیسې د فرضي کرښې په اوږدو کې وخت ناوخت د وسلو د نیولو خبرونه په ټولنیزو رسنیو کې لاس په لاس کېږي.
خو اوس اساسي پوښتنه دا ده چې پاکستان په دوه مخي سیاست کې له ناکامېدو وروسته ولې په افغانستان کې د نا امنۍ جوړولو هڅې کوي؟
د نظامي چارو شنونکی توریالی ځاځی وايي: « پاکستان د ابر قدرت هېوادونو یوه پروژه ده چې په سیمه کې د افغانستان د بربادۍ لپاره جوړه شوې. ترڅو چې پاکستان موجود وي، سیمه کې به نا امنۍ زیاتېږي نه دا چې کمې شي.»
په افغانستان کې د نا امنۍ جوړولو دغه هڅې داسې مهال کېږي چې پاکستاني چارواکي په یاد هېواد کې د امنیتي ستونزو او ننګونو پړه پر افغانستان اچوي.
خو شنونکي بیا وایي، پاکستان د غربي هېوادونو د ګټو د تحقق لپاره ترهګرې ډلې روزي.
د دوی په خبره، پاکستان اوس د خپل ناکام سیاست له امله د کړنګ په غاړه ولاړ دی.
پخوانی ډېپلومات عزیز معارج وايي: « پاکستان هېڅکله نه غواړي یو باثباته افغانستان وویني. دوی خپلې موخې او اهداف لري او د خپلو ناوړه ترهګریزو پړه پر افغانستان اچوي؛ حال دا چې پاکستان خپلواک هېواد نه دی، کورنی او بهرنی سیاست یې د غرب په لاس کې دی، غرب پروژې ورکوي او دوی یې پلي کوي. پنجاب په دې کې یوازې کمېشن اخلي.»
دا وسلې د امنیتي ځواکونو له لوري په داسې حال کې نیول شوې دي چې له دې وړاندې هم له پاکستانه د راستنېدونکو کډوالو په موټرو کې بېلابېل ډوله وسلې او نور غیری قانوني توکي د امنیتي ځواکونو له لوري نیول شوي.
