د خبريالانو یو شمېر ملاتړو بنسټونو په کابل کې د خبريالانو ملي ورځ ونمانځه.
دغه ورځ د بيان آزادۍ لپاره د مبارزې په برخه کې د خبريالانو هڅو او قربانيو ستاينې ته ځانګړې شوې او له همدې کبله د شمشاد خبريالې په شمول يو شمېر خبريالان وستايل شول.
په همدې مناسبت جوړه شوې غونډه کې ټول د خبريالانو پر ستونزو غږېږي، خو ښځينه خبريالانې بيا تر ټولو ډېرې د شرايطو او بدلونونو له امله زيانګالې بلل کېږي.
ښځینه خبریالانې تېر درې کلونه که څه هم د کار کولو له پلوه غنيمت بولي، خو زياتوي چې په لړ کې يې له ستونزو سره هم مخ وې.
دوی د حکومتي مسوولینو له لوري پر وخت د مالوماتو نه ورکړه، د خپل کار پر وړاندې لویه ستونزه بولي او زياتوي، د يادې ستونزې له امله يې راپورونه نيمګړي پاتې کېږي.
ځينې نورې خبریالانې بیا ادعا کوي چې پر رسنيو د محدوديتونو لګېدو له امله يو شمېر ښځينه خبريالانو دندې له لاسه ورکړې دي او دې کار د اقتصادي ستونزو پر زياتوالي سربېره، خبريالانې له ناڅرګند راتلونکي سره هم مخ کړې دي.
که څه هم ښځینه خبریالانې شکایت کوي چې پر رسنیو د سرپرست حکومت د محدودیتونو له امله یې د کار ساحه تنګه شوې، خو د خبريالانو ملاتړي بنستونه د یادې موضوع په ردولو سره زیاتوي، د ښځینه خبریالانو شمېر چې وړاندې ۶۰۰ تنو ته رسيده، اوسمهال یې شمېر نږدې ۸۰۰ تنو ته رسېږي.
د آزادو ژورنالېستانو د ټولنې رییس حجت الله مجددي وايي: « سږ کال د ښځینه خبریالانو شمېر زیات شوی او همدا اوس ۷۴۵ تنې ښځینه خبریالانې په رسنیو کې کار کوي. حال دا چې تېر کال دغه شمېره ۶۰۱ تنې وې. زه باوري یم چې زموږ ښځینه خبریالانې به د هغو اصولو او مقرراتو له مخې چې د اسلامي امارت له خوا وضع شوي، خپلو دندو ته ادامه ورکړي.»
له بلې خوا، خبریالان پر ملاتړ بنسټونو نیوکه کوي او وايي، د خبریالانو ستونزو ته یې پر وخت رسېدنه نه ده کړې او حقونه يې نه دي تامين کړي.
د رسنیو ملاتړو بنسټونو مسوولین بیا وایي، د خبریالانو د مسلکي روزنې لپاره یې د ظرفیت لوړونې ورکشاپونه جوړ کړي او اطلاعاتو ته د لاسرسي په برخه کې یې له حکومتي مسوولینو سره خبرې کړې چې تر ډېره یاده ستونزه هم حل شوې ده.
د ښځینه خبریالانو د بنسټ مسووله مشهوده سروري وايي:« د سږ کال په اوږدو کې د افغانستان د ښځینه خبریالانو بنسټ بې مخینې فعالیت درلود. د ښځینه خبریالانو لپاره یې له پنځو یا شپږو دورو زیات لنډمهاله د ظرفیت لوړونې کورسونه جوړ کړل، مختلف کنفرانسونه یې جوړ کړل او د ښځو د پیوستون نړیواله ورځ یې ونماځله.»
د خبریالانو د ملي کور رییس سید متین یاسین وايي: « د افغانستان له هرې برخې هره ورځ خبریالان له موږ سره اړیکه نیسي چې اطلاعاتو ته په لاسرسي کې له ستونزو سره مخ دي. که څه هم ستونزې ډېرې دي، خو موږ د خبریالانو په توګه له دوو سترو ننګونو سره مخ یو او تمه لرو چې ملاتړ نهادونه او دولتي چارواکي د دغو ستونزو هوارولو لپاره جدي هڅې وکړي.»
د ښځينه خبريالانو ستونزې داسې مهال دي چې د رسنيو او خبريالانو ملاتړو بنسټونو هم له دې وړاندې خبريالان او په ځانګړې توګه ښځينه خبريالانې له ستونزو سره مخ يادې کړې وې او اطلاعاتو ته د دوی بشپړ لاسرسی یې د حل لارې په توګه وړانديز کړی.
