کابل کې د کثافاتو مدیریت ملي کنفرانس د چاپېریال ساتنې ملي ادارې او د چاپېریال ساتنې روزنیزو او پرمختیايي چارو موسسې په نوښت پيل شو.
د چاپېریال ساتنې ملي ادارې رییس وايي، د کابل په ګډون په لویو ښارونو کې د نفوسو زیاتوالي له امله د کثافاتو تولید زیات شوی او له امله يې د چاپېریال ککړتيا ترڅنګ، د خلکو ژوند هم له ګواښ سره مخ شوی.
د چاپېریال ساتنې ملي ادارې رییس مطیعالحق خالص وايي: « که چېرې کثافات تر ځمکې لاندې خښ شي یا د ځمکې پر سر ترې لوی ډېرانونه جوړ شي، دا بیا د هوا، ځمکې او حتا اوبو د ککړتیا سبب کېږي. بله خبره دا ده چې هرڅومره کثافات په یوه ځای کې ډېر پاتې کېږي، په مختلفو ویرسونو او میکروبونو بدلېږي او ډول ډول ناروغۍ زیږوي. که موږ یوازې خوراکي پاتې شونو ته اشاره وکړو، ډېر ژر تجزیه کېږي او د ناروغیو سبب کېږي.»
د کنفرانس ځينې ګډونوال باور لري چې د کثافاتو زياتوالي نه يوازې چاپېريال ککړ کړی بلکې تر ځمکې لاندې اوبه یې هم ککړې کړې دي.
د دوی په خبره، د سالم چاپېریال رامنځته کولو او د ناروغيو مخنیوي لپاره د کثافاتو سالم او مسلکي مدیریت ته اړتیا ده.
د چاپېریال ساتنې روزنیزو او پرمختیايي چارو موسسې رییس عبدالهادي اڅکزی وايي: « کله چې په ډېران شویو کثافاتو باران وشي او پرې لمر شي او بیا یې باد هره خوا یوسي، له دې سره ډول ډول میکروبونه او ناروغۍ انتقالېږي.»
کابل ښاروالي بیا وايي، هغه څه چې دا ستونزه یې زیاته کړې، د کثافاتو د کنټرول په برخه کې د خلکو ټيټ پوهاوی دی. دوی د رسنيو او جوماتونو له لارې خلکو ته د کثافاتو د زيانونو په اړه پوهاوی ورکول او د همکاریو جلبول مهم بولي.
د کابل ښاروالۍد روغتیايي چاپېریال ریاست مرستيال فضل الکریم احد وايي: « دا دېته اړتیا لري چې موږ په ګډه خپل هېوادوال پوه کړو چې کثافات څنګه مدیریت کړي. باید دوی وپوهول شي چې خپل توکي داسې وکاروي چې بل چا ته ضرر ونه رسوي.»
د اریانا نیوز رییس مجیب الرحمان بهير وايي: « زه د چاپېریال ساتنې پر اداره غږ کوم چې د عامه پوهاوي کار ته کار ووايي، زموږ رسنۍ ستاسو او ولس په خدمت کې دي. خلک باید په دې وپوهول شي چې کثافات د دوی روغتیا ته څومره زیان رسوي.»
له سوداګرو او پانګوالو بیا غوښتنه کېږي چې د تولیداتو په پایله کې رامنځته کېدونکو کثافاتو د مديريت لپاره چې له کلي کور را نیولې تر ښارونو پورې د چاپېریال ککړتيا سبب کېږي، بايد لازم اقدامات وکړي.
