د چاپېریال ساتنې ملي ادارې له یوې همکارې موسسې سره په ګډه دکابل ښار جوماتونو ملا امامانو او دیني عالمانو سره له دیني اړخه دچاپېریال ارزښت او د دوی له لارې خلکو ته د عامه پوهاوي رسولو په موخه غونډه جوړه کړه.
په دې غونډه کې د چاپېریال ساتنې ملي ادارې رییس د کابل ښار په ځینو برخو کې تر ځمکې لاندې اوبو په تړاو اندېښنه وښوده او وویل، د ښار ترځمکې لاندې اوبه تر۶۰ سلنو ککړې شوې او له څښاک وتلې دي.
د چاپېریال ساتنې ملي ادارې رییس مطیع الحق خالص وايي: « د کابل ښار په شمالي ځنډه او د خیرخانې کوتل په سیمه کې تر ځمکې لاندې اوبه تر ۶۰ سلنو چټلې شوې او د څښلو نه دي. د خلکو له خوا د څښاک اوبو سالم مدیریت نه شته، خلکو په کورونو کې د تشنابونو اوبو لپاره جذبي څاه ګان کیندلي او دغه اوبه د څښاک اوبو څاه ګانو ته هم جذبېږي.»
خالص دغه راز وايي، د سترو فابریکو جوړېدو په تړاو هم اندېښنه وښوده چې په وینا یې دا فابریکې مضر ګازونه تولیدوي او د انسانانو د تدریجي مرګ سبب ګرځي.
نوموړی زیاته کړې، د چاپېریال ساتنې اداره نه غواړي چې دا فابریکې دې وتړل شي، خو باید د زیانونو د مخنیوي لپاره یې حل لارې ورته ولټول شي.
مطیع الحق خالص په دې اړه وايي: « د خصوصي سکټور له خوا هر کال فابریکې جوړېږي او دا د انسانانو د تدریجي مرګ سبب ګرځي او هوا چټلوي. علما باید له دې خلکو سره خبرې وکړي او د خلکو د تدریجي مرګ مخه دې ونیسي. دا ستونزه حل لاره لري، موږ نه وايو چې دا فابریکې دې بندې شي.»
په ټوله کې د چاپېریال ساتنې ملي ادارې په دې ناسته کې چې له دیني علماو سره جوړه شوې وه، غوښتنه شوې چې علما باید د ممبر او دجمعې لمانځه دخطبو له لارې د چاپېریال ساتنې، اوبو، نیالګيو او بوټو ساتنې د ارزښت په تړاو عامه پوهاوی ورکړي.
د چاپېریال ساتنې ملي ادارې رییس وايي: « اصلي موخه دا ده چې موږ له دینې اړخه د چاپېریال ساتنه، د پاکې هوا اهمیت، د اوبو ساتنه او د ځنګلونو کرلو اهمیت خلکو ته بیان کړو. دیني علما باید خلکو ته په دې اړه ذهنیت ورکړي.»
د غونډې ګډونوال چې تر ډېره دیني عالمان او د کابل ښار د جوماتونو ملا امامان دي، د چاپېریال ساتنې په برخه کې یې غونډه مهمه یاده کړې او زیاتوي چې په دې تړاو علما کولی شي په اسانۍ سره خلکو ته عامه پوهاوی ورکړي.
دیني عالم عبدالمنان تره خېل وايي: « په دې کې شک نه شته چې دیني علما د چاپېریال په ساتلو کې ښه رول لري. لامل دی چې علما له خلکو او ولس سره ډېر زیات مناسبت لري او یو د بل په مړي ژوندي کې سره راټولېږي.»
دیني عالم سمېع الله میرزايي وايي: « دا چې دینې علما په هره برخه کې له خلکو سره نږدې دي او کولی شي په دې ډول پروګرامونو کې زده کړي مطالب په اسانۍ تر خلکو ورسوي.»
دیني عالم احمدالله وايي: « علمای کرام په تدریسي پروګرامونو، د جمعې لمانځه په خطبو او نورو مناسباتو کې کولی شي د چاپېریال ساتنې په تړاو رول اداء کړي.»
په ورته مهال، د چاپېریال ستاتنې ملي ادارې د ځنګلونو پرې کېدو په تړاو هم اندېښنه ښودلې او وايي، لاهم دا لړۍ په چټکۍ سره روانه ده او که مخه یې ونه نیول شي، له سختو ستونزو سره به مخ شي.
یاده اداره وايي، د پرمختللیو صنعتي هېوادونو له لوري د ګلخانه يي ګازونو د تولید له لامله اقلیمي بدلونونه رامنځته شوي او اوس نه یوازې په افغانستان بلکې اکثریت هېوادونو کې بارانونه او واورې بې وخته ورېږي او مالي زیانونه رامنځته کوي.
