د افغانستان اسلامي امارت د امر بالمعروف او نهی عن المنکر وزارت سرپرست مولوي خالد حنفي پکتیا ولایت ته د سفر پر مهال د امریکا پرمتحده ایالتو او یو شمیر نورو هېوادونو او د بشري حقونو پر بنسټونو نیوکه وکړه،چې ګواکې د افغانانو په کورنیو چارو کې لاسوهنه کوي.
حنفي وایي، شل کلنه وسله واله مبارزه د اسلامي نظام د ټېنګښت لپاره وه،خو په خبره یې د امریکامتحده ایالت او ځېنې نور هېوادونه او بشري حقونه د الهي احکامو عملي کول د محدودیتونو لګولو په مانا بولي.
هغه زیاته کړه:« هغو امریکایانو چې ژمنه کړې وه، د افغانانو په کورنیو چارو کې به لاسوهنه نه کوي،خو دا لاسوهنه تر اوسه پورې روانه ده.»
حنفي وایي،که نړیوال پرې هرڅومره فشار رواړي،خو پر وینا یې دوی به د اسلامي شرعي نظام او د الهي احکامو له پلي کېدو راونه ګرځوي.
حنفي زیاته کړه:« زموږ ژوند د اسلامي نظام د تحکیم لپاره دی، که نړیوال وایي،چې فشار به راوړو او اسلامي امارت به له خپل دریځ راوګرځوي، نو زه قسم کوم،چې رګونو کې مو یو څاڅکی وینه هم وي،د اسلام له یوه رکن څخه هم نه تیریږو.»
د امر بالمعروف وزارت سرپرست همدا راز د اسلامي امارت پر هغه غړو هم نیوکه وکړه،چې د ویښتانو یا څڼو پریښودلو په اړه یې د امیرالمومنین فرمان نه دی عملي کړی.
حنفي زیاتوي:« دری کاله وشول،دا درېیم کال دی،چې د امیرالمومنین له طرفه فرمان ابلاغ شوی دی،چې تاسې څڼې هغه شرعي څڼې پریږدئ. ای مجاهدینو ولې ورباندې عمل نه دی شوی؟»
