د دولتي شرکتونو لوی ریاست اړوند د شمال ډبرو سکرو دولتي شرکت له لوري، د کابل په ګډون په سړو ولایتونو کې د اړمنو کورنیو ملاتړ په موخه، په ارزانه بیه د لوړ کیفیت لرونکو ډبرو سکرو د وېش لړۍ پیل شوه.
د دولتي شرکتونو رییس وایي، د کابل په ګډون به په ټولو سړو ولایتونو کې ۱۳۰ زره ټنه ډبرو سکاره هېوادوالو ته په ارزانه بیه او لوړ کیفیت وړاندې کړي.
د دولتي شرکتونو رییس احمد جان بلال وايي: « په لومړي پړاو کې به تقریبا ً ۱۳۰ زره ټنه سکاره هېواد والو ته وړاندې شي او که اړتیا پيدا شوه، نور به هم را انتقال شي. دا لړۍ به تر هغو روانه وي چې د ټولو هېوادوالو اړتیا پوره شي.»
د چارواکو په خبره، د ډبرو سکرو د وېش لومړی پړاو به د کابل په ګډون په یو شمېر نورو ولایتونو کې دوام ولري. دوی وایي، د وېش په مرکزونو کې د یو ټن ډبرو سکرو بیه ۶۸۰۰ افغانۍ ده، حال دا چې په عام بازار کې په ۱۳زره افغانۍ پلورل کېږي.
د دولتي شرکتونو رییس احمد جان بلال وايي: « هېوادوالو ته به سږ کال د هر ټن سکرو بیه په کابل کې ۶۸۰۰ افغانۍ وي. که څه هم موږ غوښتل سږ کې یې له دې هم ارزانه ورکړو، خو پر بې کیفیته تېلو د بندیز له امله د تېلو بیې لوړې شوې او له دې سره د ډبرو سکرو د انتقال نرخونه هم لوړ شول. که بیا هم په دې برخه کې بدلون راځي، زموږ قېمتونه به هم بدلون کوي. اوس د بازار عام نرخونه له ۱۳ تر ۱۴ افغانیو دي. پکتیا، پکتیکا، غزني، لوګر، میدان وردګ، کاپیسا، پروان او بامیان ولایتونو ته به په لومړي پړاو کې د سکرو د وېش لړۍ ورسېږي.»
د شمال ډبرو سکرو دولتي شرکت هېوادوالو ته په سږني ژمي کې د ډبرو سکرو د چمتو کولو مسوولیت لري. مسوولین یې د هېوادوالو د اړتیا وړ ډبرو سکرو د وړاندې کولو ترڅنګ د خپلو پروسېس شویو معدني توکو د بشپړ کیفیت ډاډ ورکوي.
د شمال ډبرو سکرو دولتي شرکت د بازار موندنې آمر عبدالقیوم احمدزی وايي: « د شمال د ډبرو سکرو امارتي شرکت د ژمي په فصل کې د ۱۲۰ زره ټنو په اندازه د ډبرو سکاره په ښه کیفیت له خپلو کانونو څخه پېرلي او د کابل ولایت ده سبز ولسوالۍ ته یې لېږدولي دي. دا سکاره له پروسېس وروسته د کابل ټولو ناحیو او سرد سېرو ولایتونو ته لېږدول شوي او هلته به په خلکو ووېشل شي.»
د امارتي شرکتونو د ریاست له لوري له عام بازار څخه په ټیټه بیه د ډبرو سکرو د وېش مرکزونه داسې مهال پرانیستل کېږي چې د راپورونو له مخې، روان کال به په هېواد کې د وروستیو کلونو په پرتله ژمی اوږد او سوړ وي، هغه څه چې یو شمېر هېوادوال یې اوسني کمزوري اقتصادي وضعیت ته په کتو د خپل زغم او حوصلې بله ازموینه بولي.
