افغان حکومت د افغان سولې په تړاو د مسکو غونډه کې د ګډون یا نه ګډون پرېکړه نه ده کړې.
د مسکو غونډه چې یو ځل د افغان حکومت په غوښتنه وځنډیده او تمه ده چې د جمعې په ورځ بیا جوړه شي، افغان حکومت پکې د ګډون او نه ګډون پریکړه نه ده کړې.
د سولې عالي شورا اعلان وکړ چې د مسکو غونډه کې به یې یو پلاوی ګډون وکړي او تمه ده چې د افغانانو په مشرۍ به دا پروسه له سولې او ثبات سره مرسته وکړي.
خو د بهرنیو چارو وزارت وایي، حکومت د مسکو غونډه کې د ګډون په اړه پریکړه نه ده کړې .
له دې سره شنونکي د مسکو غونډه د سولې پروسې لپاره مهمه یادوي او له حکومت غوښتنه کوي چې ګډون پکې وکړي.
د مسکو له غونډې سره یو ځای پاکستان او چین د بهرنیو چارو وزیرانو په یوه ناسته کې د درې اړخیزه ناستو د بیا پيل خبره کړې.
د سولې عالي شورا بیا پریکړه کړې چې یو پلاوی د مسکو غونډې ته ولیږي او تمه لري چې د افغانانو په مشرۍ به دا غونډه د سولې او ثبات برخه کې اغیزناکه تمامه شي.
د مسکو غونډه کې طالبان هم ګډون کوي، خو شرط یې دا دی چې د مسکو د غونډې اجنډا نه وي بدله شوي او په پخوانۍ اجنډا جوړه شي.
که حکومت او طالبان دواړه په دې غونډه کې ګډون وکړي، تمه شته چې یو څه پرمختګونه رامنځ ته شي، له همدې امله په دې غونډه کې د حکومت په ګډون ټینګار کیږي.
د روسیې د بهرنیو چارو وزارت تېره ورځ ویلي و چې ولسمشر غني ورسره منلې چې یو پلاوی به د مسکو غونډه کې د ګډون لپاره لیږي، خو تر اوسه حکومت په دې اړه څه نه دي ویلي.
له دې سره یو ځای د پاکستان لومړي وزیر له چینایي چارواکو سره لیدنه کې یو ځل بیا د چین، پاکستان او افغانستان ترمنځ درې اړخیزه ناستو باندې ټینګار کړی، هغه ناستې چې د سولې په تړاو د افغانانو په مشرۍ وي.
