د حزب اسلامي امیر ګلبدین حکمتیار له خپلو بهر میشتو پلویانو سره په یوې پرلیکه ناسته کې د افغانستان په تړاو د ملګرو ملتونو په وروستیو دریځو نیوکې کړې دي.
حکمتیار وايي، د افغانستان تیرو څلور لسیزو قضایاوو په تړاو د ملګرو ملتونو تاریخ ته په کتو دغه نړیوال سازمان د افغانستان د اوسنۍ قضیې او د نړیوالو پیچلو قضایاوو له حل عاجز دي .
د حکمتیار په خبره، د ملګرو ملتونو له لوري د افغانستان لپاره د بل ځانګړي استازي ټاکل یوازې د بن د تجربې تکرار دی او د دغه سازامان امنیت شورا یوازې هغه پریکړې تائید او عملي کوي چې د دغې شورا غړي یې د ځان پر ګټه ګڼي.
حکمتیار زیاتوي: « مخکېنیو ترخو او ناکامو تجربو ته په پام سره ویلی شو، چې ملګري ملتونه د پېچلو نړیوالو قضایاوو له هوارولو عاجز دي. د نوي استازي له ټاکل یوازې د بن تجربې د تکرار تمه کېدای شي نه د بل څه. دا زموږ موقف دی. امنیت شورا اصلي غړي هغه دي چې د نړۍ د ټولو ستونزو او جګړو اصلي عاملین دوی دي. یوازې هغه پرېکړې عملي کېږي چې همدا نړیوال ترهګر او جنګي جنایتکاران پرې توافق وکړي.»
حکمتیار د افغانستان لپاره د ټولګډونه حکومت د رامنځه ته کیدو له طرحې سره مخالفت وښود او زیاته کړه چې دا دهغو هېوادونو طرحې دي چې غواړي له دې لارې ځان ته نږدې څیرې او ډلې د افغانستان نظام ته داخلې کړي.
دغه راز حکمتیار وايي، هغه هېوادونه چې د افغانستان لپاره د ټولګډونه حکومت غوښتنه کوي په خپلو هېوادونو کې د داسې حکومت هېڅ ډول بیلګې نه شي وړاندې کولی.
د حکمتیار زیاته کړه: « په ټولګډونه حکومت او د لویې جرګې مسلسل او ډېر مکرر ټینګار د څه لپاره؟ په روسیه کې د یوه ګوند حکومت دی. چین کې د یوه ګوند حکومت دی. په امریکا د یوه ګوند حکومت دی او له موږ ټولګډونه حکومت غواړې؛ یعنې څه؟ ولې په ټولګډونه حکومت ټینګار کوئ؟ افغانان پوهېږي چې له دې مو موخه دا ده چې ستاسې د خوښې حکومت جوړ شي، هغه حکومت تاسې ټولګډونه ګڼئ چې په تاسو پورې تړلې په کې شریک وي، تاسو همغسې حکومت جوړول غواړئ چې په بن کې جوړ شوی وه.»
په دې تړاو د نظر خاوندان هم په دې باور دي چې د ټولګډونه حکومت د غوښتنې ترشا سیاسي اهداف نغښتي دي او له تیرو ۴۰ کلونو راهیسې افغانان د نړیوالو سیاسي اهدافو قرباني دي.
د سیاسي چارو شنونکی توریالی ځاځی وایي : « ولې نړیوال هېوادونه ټولګډونه حکومت غواړي؟ د دې لپاره چې دوی دلته سیاسي موخې لري او د خپلو سیاسي موخو لپاره یې څلورو لسیزو کې افغان ولس او هېواد قرباني کړ او بیا هم غواړي چې هماغه جنګي جنایتکاران، جنګي جنګسالاران په ټولګډونه حکومت کې یوځای کړي ترڅو د دوی سیاسي موخې او ګټې دلته پلي کړي.»
د افغانانو ترمنځ د هرډول بهرني منځګړیتوب او حضور پرته د مذاکراتو پیل او د داسې معتبرې مرجع رامنځ ته کولو چې د افغانستان د ټولو ملي مسایلو په اړه یې پریکړې ټولو ته دمنلو وي د حزب اسلامي مشر یې د اوسني وضعیت د حل یوازینۍ لار ګڼي.
ګلبدین حکمتیار وايي: « د حل لار یوازې دا ده چې افغانان د پردیو له مداخلې او هر راز څرګند او نا څرګند حضور او اغېز پرته په خپلو کې په صادقانه توګه خبرو اترو ته کېني او د یوې داسې درنې او معتبرې شورا په جوړولو توافق وکړي چې په واقعي مانا ملي اجماع تمثیل کړي، ټول مهم ملي مسایل همدې شورا ته محول شي او هره پرېکړه چې د همدې شورا له لوري کېږي ټول یې درناوی وکړي.»
شاوخوا ۱۰ ورځې وړاندې د ملګرو ملتونو امنیت شورا د رایو په اکثریت له افغان حکومت سره د د تعامل څرنګوالي په تړاو داسې پریکړه لیک تصویب کړ چې له مخې به یې د ملګرو ملتونو عمومي منشي له افغان چارواکو سره د ډیپلوماسۍ لپاره ځانګړی استازی ټاکي او دغه ګومارنه له امنیت شورا سره په مشورې ترسره کیږي.
