حکمتیار وايي، د تېرو حکومتونو د کابینو غړي یا له هېواده بهر او یا هم د نورو په انتخاب ټاکل کیدل،خو دا لومړی حکومتي مشران دي،چې په کور دننه ټاکل شوي دي.
حکمتیار زیاته کړه:« که د دې نوې کابینې ترکیب له مخکینو سره مقایسه کړو،نو دا حکومت له مخکینو له څو پلوو ترجیع لري، د تائید او حمایت وړ دی. مخکیني حکومتونه او کابینې په بهر کې جوړې شوې وې، د جاسوسانو او پردي پالو ځاله وه، کمونیستان او سیکولران ، ملحدین او ستر ستر مفسدین یې د کابینو غړي وو. له اوسنۍ کابینې او حکومت زموږ ملاتړ په حکومت کې پر شاملیدو مشروط نه دی. موږ یې ملاتړي یو او د خیر په کار کې د هرچا ملاتړ کوو.»
حکمتیار زیاتوي:« دافغانستان او افغانانو امکانات،چې خلکو غلا کړي او تاسو یې ورته په بانکونو کې ساتئ دا بیرته افغانستان ته مسترد کړئ. افغانستان مو وران کړی او د دې خساره جبران کړئ. دغسې شرایط باید د بهرنیو سفارتونو د بیا پرانیسې لپاره وضع شي، طالبان باید د هغو هېوادونو د سفارتونو په بیا پرانیسته کې له غور کار واخلي،چې دافغانستان په جګړه کې مستقیم ښکیل ول. یو نیم میلیون افغانان یې وژلي او بارود یې افغانستان ته راوړي دي.»
خو له دې وړاندې د طالبانو له لوري په اعلان شوې کابینه ځینې نیوکې وې،چې ګني د ژمنو پر اساس نه ده تشکیل شوې،خو طالبانو ویلي، کابینه یې ټول شموله او هر ډول تغیرات په کې ممکن دي.
