د حق او عدالت ګوند مشر حنیف اتمر د بهرنیو چارو وزارت سرپرست او نوماند وزیر وټاکل شو.
ولسمشر غني د لوړې مراسمو وروسته د نوي حکومت د کابینې پر جوړلو کار پیل کړی، چې تر اوسه یې عبدالهادي ارغندیوال د مالیې وزارت سرپرست او نوماند، ضیاء سراج د ملي امنیت عمومي ریاست نوماند او تازه یې د ملي امنیت پخوانی سلاکار محمد حنیف اتمر د بهرنیو چارو وزارت سرپرست او نوماند وزیر به توګه ټاکلی دی.
له ارګ خپره شوې اعلامیه کې راغلي چې افغان ولسمشر محمد اشرف غني د دوو جلا حکمونو پر اساس، محمد حنیف اتمر د بهرنیو چارو وزارت سرپرست او نوماند وزیر په توګه وټاکه.
افغان ډيپلوماټان او لیکوالان په بهرنیو چارو وزارت کې د حنیف اتمر ګمارنه یو نېک اقدام او د بهرني سیاست لپاره یې وړ شخص بولي.
خواله رسنیو کې هم د دې پریکړې هرکلی شوی دی.
له ارګ خپره شوې اعلامیه کې راغلي ((د هیواد جمهوررئیس د اساسي قانون د ۶۴ مادې د ۱۳ فقرې حکم پر اساس، محمد حنیف اتمر د بهرنیو چارو وزارت د سرپرست او نوماند وزیر په توګه وټاکه او په چارو کې یې ورته د بریالیتوب هیله وکړه.))
محمد حنیف اتمر د هیواد له مطرح او اغېزناکو سیاسي شخصیتونو یادیږي، چې په تېرو دوو لسیزو کې یې د کلیو پراختیا وزیر، د پوهنې وزیر، کورنیو چارو وزیر او په وروستیو کې یې د ملي امنیت سلاکار په توګه کار کړی دی.
مخکینی افغان ډيپلومات صفت صافی باور لري، چې په بهرنیو چارو وزارت کې د حنیف اتمر له ګمارنې وروسته به په ستراتيژیک او بهرني بُعد کې د افغانستان ملي منافع تامین شي.
افغان لیکوالان په نوي کابینه کې د حنیف اتمر په څېر وړ او د مسلکي کسانو پر ګمارنه خوښ دي او حنیف اتمر د بهرنیو چارو وزارت لپاره وړ شخص یاوي.
محمد حنیف اتمر په تېرو ټاکنو کې د ولسمشریزو ټاکنو سیالۍ ته وتلی و، خو بیا یې وضعیت ته په کتو له ټاکنو شاتګ وکړ او ویلي یې و چې د نظام د ساتلو او سولې برخې ته به کار وکړي.
خواله رسنیو کې هم د حنیف اتمر د ګمارنې هرکلی شوی او باور ښودل شوی چې د بهرنیو چارو مهم وزارت به پخواني برم ته وګرځیږي، د اصلاحاتو لړۍ به پکې تطبیق او مسلکي کسان به له هېواده بهر د افغانستان استازیتوب وکړي.
