د امر بالمعروف، نهې عنالمنکر او شکایتونو اورېدلو وزارت سرپرست د اسلامي امارت رهبر د وروستي فرمان د تطبیق په موخه له محتسبینو سره ناسته کړې.
دغه فرمان په تېرې مارچ مياشتې کې صادر شوی چې د ۲۴ مادو په لرلو سره په کې د ښځو حقونو، د نکاح، مهر، په زور ودونو او د ودونو او حج لګښتونو او ناسمو رواجونو په تړاو په کې وضاحت ورکړل شوی دی.
په دې غونډه کې د امر بالمعروف، نهې عن المنکر وزارت سرپرست محمد خالد حنفي محتسبینو ته له خلکو سره د نرم چلن سپارښتنې کړې او ټینګار یې کړی چې د اسلامي احکامو د تطبیق په موخه دې د چا پروا نه کوي.
حنفي زیاته کړې: « راځئ موږ په دې ټولنه کې داسې اصلاح راولو چې زما او ستا له ویلو پرته یې بهترین لباس جوړ کړی وي، لنګوټه یې په سر کړې وي، ځکې د هغه ذهن سازي شوې وي. نو قدرمنو! تاسو زموږ خویندو، وروڼو، علماوو، کادرونو او عام ولس ته ورشئ او دروازه ور وټکوئ، د نوح (ع) سلام په څېر.»
حنفي دغه راز ویلي، د تېرو دوو لسيزو پرمهال د ځوانانو پر ذهنیت سازۍ پراخ کار شوی او له محتسبینو غواړي چې په مکروه، فرایضو، سنتو او نورو دیني مسایلو يې د پوهولو لپاره نه ستړې کېدونکې هلې ځلې وکړي.
نوموړی له دې ورهاخوا سلمانيو ته پر کلکې سپارښتنې هم ټينګار کوي چې د خلکو د ږيرو له خرېیلو ډډه وکړي.
د امر بالمعروف او نهې عن المنکر وزارت سرپرست زیاته کړې: « اوس چې څوک ږیره کلوي او ته محتسب یې، باید هغه دوکانونو ته هم سپارښتنه وکړئ او ورته ووایئ چې تاسو له دې لارې روزي پيدا کوئ، دا ستاسو لپاره حرامه ده. سلمانیو سره مجلسونه وکړئ او د ږیرو خرېیلو اضرار بیان کړئ. دوی ته به ستاسو خبره ډېره نا آشنا ښکاره شي او وايي به چې نړۍ کوم ځای ته ورسېده او تاسو اوس هم په ږیرو اخته یاست؛ ځینې پروژه یان به وايي چې وجود زما او اختیار یې د ملا.»
خالد حنفي همدا راز پر محتسبینو ټینګار کړی چې د اسلامي امارت د رهبر شېخ هبةالله اخندزاده د حکم له مخې دې د هغو کسانو پر وړاندې چې نجلۍ ته مهریه نه ورکوي، د کونډې حق خوري، د کوژدې پرمهال د نجلۍ رضایت نه مني، د ښاديو پر مهال اصراف کوي او په شخصي ډول دولتي موټر کاروي جدي اقدام وکړي.
نوموړي همدا راز له محتسبینو دا هم غوښتي چې کور په کور وګرځي او کورنیو ته د حجاب سپارښتنې وکړي.
محمد خالد حنفي په دې اړه وايي: « موږ او تاسو د خپلو خویندو میراث هم خورو، مهر یې هم خورو او حق نه ورکوو؛ په تېرو ۵۰ کالو کې د دې مخنیوی او کنټرول چا نه دی کړی، خو اوس فرمان راغلی او که بیا هم له چا پوښتنه نه کېږي یا یې په زور او ظلم سره چاته په نکاح ورکوي، دغه کسان باید تاسو تعقیب کړئ.»
له دې سربېره، نوموړي ویلي، که محتسبین د خپلو دندو پر وړاندې بې غوره او د منکراتو پر وړاندې بې تفاوته پاتې شي، له اوسني نظام سره جفا ده او په اړه به يې خدای ته ځواب ورکوي.
