په شمال ختیځ زون کې د خبریالانو او اطلاعاتو او فرهنګ وزارت ترمنځ د همغږۍ په موخه ناسته جوړه شوه.
ناسته کې چې د شمال ختیځ زون د ټولو ادارو ویاندویانو او یو شمېرخبریالانو برخه اخیستې وه، د اړوند وزارت له خوا په بېلابېلو برخو کې د همکارۍ ژمنه وشوه.
د اطلاعاتو او فرهنګ وزارت د خپرونو معین ضیاء الحق حقمل ناسته کې د وینا پر مهال وویل، هڅه کوي اطلاعاتو او معلوماتو ته د لاسرسي په برخه کې خنډونه او ستونزې هوارې او نوی قانون مطبوعاتو ته په واک کې ورکړي.
حقمل په دې اړه وايي:« د امربالمعروف وزارت په قانون کې یو مورد راغلی چې په اړه یې توضېحات زموږ لپاره هم سخت دي. باید له رهبرۍ یوڅه تفصیلات واخلو، موږ په دې اړه له امربالمعروف وزارت معلومات اخیستي او راته ویلي یې دي چې د قانون د تفصیل لپاره په یوه بل سند کار روان دی چې په کې د قانون تفصیلات وړاندې شوي. همدارنګه د رسنیو د قانون په اړه هم کار شوی، امیرالمؤمنین ته د توشېح لپاره استول شوی و، خو د ځینو موضوعاتو تفصیل ته اړتیا وه، ځکه بېرته موږ ته استول شوی و.»
په اطلاعاتو او فرهنګ وزارت کې اطلاعاتو ته د لاسرسي مسوول رحمت الله نړیوال وايي:« اطلاعاتو ته د لاسرسي ریاست پوره هڅه کوي چې اطلاعاتو ته د لاسرسي په برخه کې که چېرې خنډونه وي، هغه له منځه یوسي. خنډونه به خامخا شتون ولري، ځکه حالات دغسې دي. دا چې یو نظام تر بل توپیر لري او هر نظام خپل اصول لري، نو اطلاعاتو ته د لاسرسي په برخه کې به هم توپير موجود وي، خو زموږ د ریاست پوره هڅه دا ده چې اطلاعاتو ته د لاسرسي حق تضمین کړي.»
په دغه ناسته کې د یوشمېر ادارو ویاندویانو او خبریالانو ټینګار وکړ چې دغه ډول ناستې اطلاعاتو ته د لاسرسي برخه کې مهمې دي او باید دوام ورکړل شي.
د بدخشان امنیې قوماندانۍ ویاند احسان الله کامګار وايي: « بېله شکه دا یوه ګټوره غونډه ده، هم موږ یو څه زده کوو او هم د ګډونوالو ترمنځ اطلاعات شریک کېږي. زموږ وړاندیز دا دی چې دغه شان پروګرامونه نور هم جوړ شي.»
ځايي خبریال فخرالدین وايي: « دا یوه ډېره ګټوره ناسته وه، هیله لرو دغه شان ناستې اطلاعاتو ته د لاسرسي حق په غرض په ټولو ولایتونو کې جوړې شي. د یوه خبریال په توګه غوښتنه کوم چې د اسلامي امارت حکومت اطلاعاتو ته د لاسرسي قانون او د رسنیو قانون ژر تر ژره تصویب کړي.»
صدرالدین : « د اطلاعاتو او فرهنګ وزارت له خوا د دې ډول ناستو جوړېدل ډېر ښه دي؛ ځکه چې د حکومت او خبریالانو ترمنځ اړیکې پیاوړې کوي او دغه راز سبب کېږي چې ادارات خپل اړوند اطلاعات په ټاکلي وخت د خبریالانو په واک کې ورکړي.»
خبریال اکمل رحماني د انځوریزو رسنیو د تړل کېدو په تړاو اندېښنه لري او وايي: « دا مهال هر پروګرام چې په افغانستان کې د خبریالانو لپاره جوړېږي، یو مثبت ګام دی او خپلې ګټې لري؛ ځکه چې خبریالان یو ډول اندېښنه لري او دا چې که انځوریزې رسنۍ وتړل شي، خبریالان نه شي کولی خپلو کارونو ته ادامه ورکړي.»
د اطلاعاتو او فرهنګ وزارت چارواکي وايي، ورته ناستې به په ټولو ولایتونو کې تر سره کړي ترڅو د خبریالانو او چارواکو ترمنځ اطلاعاتو ته د لاسرسي برخه کې شته ستونزې حل شي.
