د کورنیو چارو وزارت سرپرست خلیفه سراج الدین حقاني د پاکستان ځانګړي استازي صادق خان سره په لیدنه کې د دواړو خواوو ترمنځ د اړیکو د لا ښه والي او شته ستونزو د حل لپاره پر یو لړ موضوعاتو خبرې کړې.
د کورنیو چارو وزارت ویاند عبدالمتین قانع په دې اړه وايي: « پاکستان لوري وویل چې هېواد یې ژمن دی چې د افغانستان او پاکستان ترمنځ شته ستونزې په ګډو هڅو حل کړي او دغه راز د دواړو هېوادونو ترمنځ اقتصادي او ولسي اړیکې لا پیاوړې شي.»
د کورنیو چارو وزارت ویاند په ورته مهال د کورنیو چارو سرپرست وزیر خلیفه سراج الدین حقاني له خولې هم ویلي چې اوس د دې وخت را رسېدلی چې د امنیتي او سیاسي ستونزو د حل لپاره ګډې هڅې چټکې شي، ترڅو د دواړو خواوو د ولسونو ترمنځ اړیکې له زیانمنېدو وساتل شي او د سیمې ټیکاو او پرمختګ تضمین شي.
د پاکستان ځانګړی استازی صادق خان بیا وایي، د کورنیو چارو له سرپرست وزیر سره یې د دواړو هېوادونو ترمنځ د دوه اړخیزو اړېکو پر پراختیا خبرې کړې.
نوموړي پر خپله ایکس پاڼه د افغانستان او پاکستان پیاوړې اړیکې او همکاري د دواړو هېوادونو پر ګټه بللې دي.
خان زیاته کړې:« د افغانستان کورنیو چارو سرپرست وزیر سراج الدین حقاني سره مو په دوه اړخیزو اړیکو او نورو مهمو مسایلو خبرې وکړې. د دواړو هېوادونو نږدې اړېکې او همکارۍ کولی شي په بېلابېلو برخو او مسایلو مثبت اغېز ولري.»
د افغانستان په چارو کې د پاکستان ځانګړی استازی محمد صادق د دوشنبې په ورځ(د مرغومي پر ۳ مه) ناوخته ویلي و چې د یوه پلاوي پر مشرۍ کابل ته راغلی.
هغه پر خپل اېکس پاڼه هیله څرګنده کړې چې د سرپرست حکومت له چارواکو سره به یې ليدنې مانا لرونکې وي.
صادق خان ویلي: « موږ د افغانستان له سرپرست وزیرانو سره په بېلابېلو برخو کې د متقابلو ګټورو همکاریو د پیاوړتیا په موخه مانا لرونکو ليدنو ته سترګې پر لار یو.»
صادق د دغه سفر یوه بله موخه د افغانستان او پاکستان تر منځ د وروڼو د اړیکو پراختیا یاده کړې.
په دې وروستیو کې داسې ګومان کېده چې د افغانستان او پاکستان ترمنځ سیاسي اړیکې ترینګلې شوې دي.
په افغانستان کې د اسلامي امارت له بیا واکمنۍ وروسته په پاکستان کې د پاکستاني طالبانو تحریک(ټي.ټي.پي) د فعالیتونو او بریدونو پراخېدل د دواړو لورو ترمنځ د ترینګلتیا یو له مهمو عواملو ګڼل کېده.
د سیاسي چارو شنونکي بیا وایي، پاکستاني چارواکي هڅه کوي چې په دغه هېواد کې د روان امنیتي وضعیت د کابو کولو لپاره له افغانستان سره اړېکې ورغوي.
د سیاسي چارو شنونکی ډاکټر معین ګل څمکنی وايي: « البته دا لیدنه په داسې وخت کې کېږي چې پاکستان دا مهال له اقتصادي، سیاسي او نظامي ستونزو سره مخامخ دی. د امریکا د نوي مشرتابه سره پاکستان هم خپلې هڅې پیل کړې چې په کوردننه اختلافونه حل کړي او دغه راز د سیمې له هېوادونو سره هم خپل اختلافونه ختم کړي.»
د افغانستان او پاکستان ترمنځ د ترینګلو اړیکو په دوام؛ د پاکستان له خوا د افغانستان لپاره د ځانګړي استازي له ټاکل کېدو وروسته دا افغانستان ته د صادق خان لومړی سفر دی.
د پاکستان د لومړي وزیر او دفاع وزیر په ګډون پاکستاني چارواکو له دې مخکې ویلي، د پاکستاني طالبانو تحریک جنګیالي په افغانستان کې خوندي پټنځایونه لري او هغوی د اسلامي امارت په ملاتړ هلته خپل بریدونه تنظیموي.
خو اسلامي امارت د پاکستاني چارواکو دا ډول ادعاوې رد کړې او ویلي یې دي، دوی له دې ډلې ملاتړ نه کوي او په پاکستان کې د تاوتریخوالي وروستي زیاتوالی د دې هېواد کورنۍ ستونزه ده.
