Skip to content
کابل کې د لویې جرګې تالار کې د علماوو سترې غونډې پر دویمه ورځ ناستې ته د کورنیو چارو سرپرست وزیر سراج الدین حقاني د وینا پر مهال وویل،نړۍ دې له هغه غوښتنو تېره شي چې لومړیتوب یې د ټولګډونې ادارې جوړول دي.
حقاني زیاته کړه:« جهادي دوره خدای ج په بریاليتوب سره پایته ورسوله، اوس د حکومت دارۍ دوره ده. دا مسله،چې اوس نړۍ وايي، ټولشموله، د زده کړو مسله او نورې مسلې،دا خبرې چې کوي،دا ټولې له وخت وړاندې خبرې دي. نننۍ ناسته زموږ او تاسو د اعتماد ناسته ده، د تعامل ناسته ده.»
په ورته وخت کې حقاني وايي، د نظام بقاء او د حکومت پایښت ته کار کول د اوس لپاره اړین وبالل.
اخوا د ریاست الوزارء اداري مرستیال عبدالسلام حنفي بيا د علماوو ناستې د وینا پر مهال وویل،هڅه کوي، د خلکو او حکومت تر منځ شته واټن راکم کړي، اداري فساد ختم او له نشه يي توکو سره کلکه مبارزه وکړي.
هغه زیاته کړه:« په اسلامي نظام او د ا.ا.ا کې هر ډول تبعیض محکوم دی او هېڅ ځای نه لري. ټول افغان ملت سره وروڼه دي. ټولې نړۍ ته دا جوته ده،چې افغانستان په اداري او اخلاقي فساد ککړ و او په اداري فساد کې یې لومړی ځای خپل کړی و. الحمدلله د ا.ا.ا تر حاکمیت وروسته هر ډول فساد په ادارو کې صفر ته رسېدلی دی.»
عبدالسلام حنفي د هغو کسانو د مجازات کولو خبره وکړه،چې په لویو ښارونو او سیمو کې بریدونه کوي او د عامه نظم د تخریب لامل ګرځي.
همدا راز د کورنیو چارو سرپرست وزیر خپلو چارواکو ته سپارښتنه وکړه، چې د تېر نظام کارکوونکو ته دې پیغورنه نه کوي.
حنفي وايي:«چا چې مخالفت درلود،خپل هېواد ته دې راشي. خپل ملکیت ته دې راشي.مال او جایدادونه یې خپل دي،خو څوک چې اختلافاتو، فتنو او چاودنو ته لمن وهي، هغوی به محاکمه کېږي.»
د دویېمې ورځې په دغه ناسته کې د هېواد له بېلابېلو سیمو راغلیو نورو علماوو هم خبرې وکړې او د اسلامي نظام د بقاء مشورې یې ورکړې.
د دغې ناستې له پیل وړاندې نظرونه دا ول،چې د ټولګډونه حکومت، داخلي مشروعیت او د ښځو د حقونو،بشر حقونو او نورو مهمو مسایلو په اړه به په کې خبرې وشي.
