د کورنیو چارو وزارت سرپرست وزیر سراج الدین حقاني د شنبې پر و رځ د « ۱۴۰۲ کال د لېندۍ پر ۱۱ مه» د اسلامي نړۍ د ديني عالمانو له پلاوي سره وکتل.
په لېدنه کې حقاني وویل، د افغانستان واک له دیني عالمانو سره دی او په خبره یې دوی د هېواد پر ګټو ښه پوهېږي.
د کورنیو چارو وزارت ویاند شمشاد ته په خبرو کې وویل، د فلسطین پر خلکو د روان ظلم له امله ټول اسلامي امت ځوریږي او له فلسطینیانو سره مرسته به افغانان ته یو ویاړ وي.
د کورنیو چارو وزارت ویاند عبدالمتین قانع وايي: « خلیفه صاحب! د فلسطین شهیدانو ته له دعاګانو وروسته وویل، موږ د فلسطین د مسلمانانو درد احساسوو او د یهودي اشغالګرو د بې عدالتۍ له امله ځورېږو. سرپرست وزیرهېله وښوده چې د فلسطینیانو د مقاومت په پایله کې به ان شاءالله د فلسطین خاوره د اشغالګرو له منګولو ازاده شي.»
قانع وایي، حقاني دې لېدنه کې د نړۍ علماوو ته ویلي، سرپرست حکومت په تېرو دوه نیمو کلونو کې په بېلابېلو برخو کې او په ځانګړې توګه له نشه یي توکو سره مبارزه کې ښیې لاسته رواوړنې لرلي دي.
حقاني زیاته کړې، د افغانستان اقتصاد د هرې ورځې په تېرېدو د ښه کېدو لور ته روان دی او د هېواد د بیارغونې چارې هم په چټکۍ سره روانې دي.
قانع وايي: « حقاني وویل چې په تېرو دوو کلونو کې د نشه يي توکو پر وړاندې مبارزه او د روږدو کسانو درملنه په ښه توګه ترسره شوې. امنیت ډاډمن دی، اقتصادي ثبات او پرمختګ د بلې هرې ورځې په تېرېدو وده کوي او د هېواد د بیا رغونې بهیر په چټکۍ سره روان دی.»
د اسلامي هېوادونو د علماوو د پلاوي مشر علي قر داغي په دغه لېدنه کې افغانستان سره د قطر د مرستو له دوام ډاډ ورکړ او زیاته کړه چې د فلسطین درد د ټول اسلامي امت درد دی.
دغه پلاوي همدا راز په افغانستان کې د وروستۍ زلزلې ځپلو او له پاکستانه د افغان کډوالو د جبرې اېستلو په تړاو اندېښنه ښودلې او ټینګار یې کړی چې په دغه ازموینه کې به سرپرست حکومت بریالي وي.
خو افغانستان ته د دغه پلاوي سفر څومره اغېزناک تمامیدای شي؟
د نړیوالو اړیکو کارپوه واحد فقیري وايي: « له عصري علومو سره چې کومه دوښمني روانه ده دا باید ختمه شي، ترڅو چې دا دوښمنی روانه وي مسلمانان به هېڅکله له دې ذلت او خوارۍ خلاص نه شي.»
د سیاسي چارو کارپوه سرور نیازی وايي:« له بده مرغه خپله ټول په غربي هېوادونو، امریکا، روسیې او چین پورې تړلې دي او د هغوی سیاستونه پرمخ بیايي.»
دا په داسې حال کې ده، چې وړمه ورځ د اسلامي هېوادونو پلاوي د بهرنیو چارو وزارت سرپرست سره هم کتلي وه او مولوي امیر متقي په لېدنه کې ویلي وو، چې افغانستان امن دی او ټینګار یې کړی چې دا لومړی ځل دی چې افغانستان د تېلو د تولید کوونکو هېوادونو په نوملړ کې راځي.
دغه پلاوی وایي، د نړۍ اسلامي عالمان د سرپرست حکومت ترڅنک ولاړ دي او له هېوادونو او اسلامي امته یې غوښتي چې له افغانانو ملاتړ وکړي.
