د کورنیو چارو وزیر په سولې او سیاسي چارو کې د ملګرو ملتونو سرمنشي مرستیالې په مشرۍ له راغلي پلاوي سره کتنه کې د افغانستان او نړیوالې ټولنې ترمنځ پر سیاسي تعامل خبرې کړې.
د کورنیو چارو وزارت چارواکي وایي، خلیفه سراجالدین حقاني له روزمیري ډيکارلو سره په کتنه کې له افغانستان سره په سیاسي تعامل کې د پرمختګونو، د نشهيي توکو پر وړاندې مبارزې په برخه کې پر همکاریو، د اقتصادي ثبات پر پیاوړتیا، له خصوصي سکټور د محدودیتونو لرې کولو پر لارو چارو او د ملګرو ملتونو له لوري د بشري همکاریو پر موثریت هم بحث او خبرې شوې دي.
د کورنیو چارو وزارت ویاند عبدالمتین قانع وايي: « په دې ناسته کې د افغانستان او نړیوالې ټولنې ترمنځ د تعامل د پرمختګ، مخدره موادو پر وړاندې مبارزې په برخه کې پر همکاریو، د اقتصادي ثبات پر پیاوړتیا، خصوصي سکټور ته د شته محدودیتونو لرې کولو پر لارو چارو او د ملګرو ملتونو له لوري د بشري همکاریو پر موثریت بحث او خبرې وشوې.»
د سیاسي چارو شنونکي وایي، د اسلامي امارت او نړیوالې ټولنې ترمنځ د سیاسي تعامل لپاره اړتیا ده چې له دا ډول ليدنو مثبته ګټه پورته شي. د دوی په خبره، دا ډول ناستې او خبرې د اړېکو پراخولو لپاره هم خورا مهمې دي.
د سیاسي چارو شنونکی معین ګل څمکنی وايي: « دا په خپله د اړیکو جوړولو لپاره یو ښه فرصت دی. د دوحې درېمه ناسته کې ځینې ټکي وو چې د عملي کولو لپاره یې باید ګامونه پورته شي. همدارنګه فکر کېږي او غوښتنه هم همدا وه چې دا ځل به د دوحې ناسته په کابل کې وشي.»
په ياده ليدنه کې د کورنیو چارو وزیر ویلي، د نشهيي توکو کرکيلې، تولید او قاچاق پر وړاندې جدي او عملي اقدامات ترسره شوي او مثبتې پايلې لري.
له دې وړاندې بهرنیو چارو وزیر هم د ملګرو ملتونو سرمنشي له مرستیالې سره په کتنه کې ویلي و چې په افغانستان کې د نشهيي توکو د کښت او قاچاق پر وړاندې حکومت جدي مبارزه کړې.
نوموړي که څه هم د کوم هېواد نوم نه دی په ډاګه کړی، خو اندېښنه یې ښودلې چې که په سیمه کې له افغانستانه بهر د نشهيي توکو د کښت مخه ونه نیول شي، نه يوازې افغانستان بلکې سیمه او نړۍ به هم د تېر په څېر یو ځل بیا ترې زیانمن شي.
د بهرنیو چارو وزارت مرستيال وياند ضیا احمد تکل وايي: « د بهرنیو چارو وزیر په افغانستان کې د مخدره موادو د کښت او قاچاق پر وړاندې د اسلامي امارت د جدي اقداماتو یادونه وکړه او په ورته وخت کې یې اندېښنه وښوده چې که په سیمه کې له افغانستان نه بهر د مخدره موادو د کښت مخه ونه نیول شي، نو نه يوازې افغانستان بلکې سیمه او نړۍ به هم د تېر په څېر یو ځل بیا ترې زیانمن شي.»
د چارو ځينې نور څارونکي بیا وایي، په سیمه کې یوازې پاکستان دی چې د نشهيي توکو کښت او تولید په کې ترسره کېږي.
د سیاسي چارو شنونکی اسماعیل ځدراڼ وايي: «نشه يي توکي افغانستان کې مطلق بند شوي او دلته یې هېڅ څرک نه لیدل کېږي، خو په ځینو ګاونډیو هېوادونو او په ځانګړې توګه پاکستان کې نشه يي توکي کرل کېږي او د ټابلېټونو په بڼه یې صادروي. نړیوالې ټولنې او ملګرو ملتونو ته په کار ده چې بندیزونه پرې ولګوي، ترڅو لاس ترې واخلي.»
له دې وړاندې داسې راپورونه هم خپاره شول چې د پاکستان تر کنټرول لاندې سيمو کې د نشهيي توکو کرکيله زياته شوې او د حاصلاتو له ترلاسه کېدو وروسته افغانستان ته د يادو توکو د قاچاق هڅې کېږي.
خو حکومت ډاډ ورکوي چې هېواد ته پر يادو توکو سربېره، د هر ډول توکو د قاچاق مخه نیول شوې ده.
