د پاکستان لنډمهالي حکومت بهرنیو چارو وزیر جليل عباس جیلاني په یوه خبري ناسته کې یو ځل بیا تور پورې کړی چې دغلته په ترسره شویو بريدونو کې د افغانستان له خاورې استفاده شوې.
جیلاني ویلي، بېلابیلې وسلهواله ډلې له افغان خاورې په ګټنې پاکستان کې بریدونه ترسره کوي چې په وینا یې د افغانستان حکومت يې باید د مخنیوي په برخه کې خپلې ژمنې عملي کړي.
جیلاني دغه راز ویلي، د افغانستان، پاکستان او چین ترمنځ په درې اړخیزه ناسته کې چې څو میاشتې وړاندې ترسره شوې، افغان لوري ژمنه کړې وه چې د پاکستان خلاف د افغانستان خاورې کارېدو ته به اجازه نه ورکوي.
هغه زیاته کړې:« له افغان چارواکو سره مو خبرې روانې دي. په دې خبرو اترو کې مو ټینګار پر دې دی چې هغه بریدونه چې له افغان خاورې پر پاکستان ترسره کېږي او یا هم هغه بېلابېلې وسلهوالې ډلې چې هلته موجودې دي، مخه نیول یې د افغانستان د سرپرست حکومت مسوولیت دی. هغه څه چې دوی په خپله له موږ سره په دوه اړخیزو ناستو کې ژمنه کړې. زموږ تمه هم همدا ده.»
جیلاني دغه راز ادعا کوي، چې د افغانستان سرپرست حکومت سره په خبرو کې چارواکو پاکستاني لوري ته د ټي.ټي.پي د شااوخوا ۲۰۰ اړونده کسانو د نېول کېدو ډاډ ورکړی.
جیلاني ویلي، د افغانستان له سرپرست حکومت یې غوښتي، که دغه کسان د ټي.ټي.پي غړي وي نو باید ټول يې پاکستان ته وسپارل شي.
هغه زیاتوي:« افغان حکومت له موږ سره په وروستۍ ناسته کې د نیول شویو کسانو په هکله ویلي، که چېرې هغه افغان اتباع وي نو څرګنده ده چې د غوښتلو حق یې نه لرو؛ خو که نیول شوي کسان زموږ اړوند وي، نو د پاکستان له قانون سره سم باید سزا ورکړل شي.»
له افغانستان څخه پاکستان ته د ترهګرۍ د پراخېدا په تړاو د افغانستان سرپرست حکومت دغه تورنه رد کړي او په وار وار یې یاد هېواد او نړۍوالې ټولنې ته له ترهګرۍ سره پرېکون په تړاو ډاډ ورکړی دی.
د سیاسي چارو شنونکي هم د پاکستان ورته ادعاوې بې ځایه بولي او د یاد هېواد له لوري یې د یوې بلې لوبې د پیل او د خپلو سیاسي او ستراتیژیکو اوږدمهاله ګټو او موخو ته د رسېدا لپاره نوې پلمه ګڼي.
دوی په دې باور دي چې افغانستان او پاکستان د دوو ګاونډیو هېوادونو په توګه په سیمه کې د یو او بل حضور ته اړ دي نو له همدې امله پاکستان دې دا خوب نه ګوري، چې خپله ځواکمنیا د افغانستان په کمزورتیا کې ولټوي.
د شنونکو په خبره، تجربو ثابته کړې، چې له ستونزو سره د افغانستان مخ کېدل کولای شي نور هېوادونه په اتوماټیک ډول له ننګونو سره مخ کړي نو له همدې امله پاکستان باید د وسلهوالو او ترهګرۍ په تړاو روانه لوبه پای ته ورسوي.
واک ته د اسلامي امارت له رسېدو وروسته پاکستان چې تل د نړیوالو ترهګرۍ او وسله والو ډلو ټپلو د خونډي پټن ځایونو د مرکز په توګه یاد شوی او د ترهګرۍ د ملاتړ او ورسره نمایشي مبارزې له لارې میلیاردونه ډالر ترلاسه کړي؛ دا مهال غواړي له دغې تاریخي بدنامۍ ځان خلاص او په بې ځایه ادعاوو غواړي ځان نړیوالو ته سپین وښيي.
