د ننګرهار ولایت مرکز جلال اباد اوسېدونکي وايي، د منظم کانالیزاسیون د نه لرلو له امله د کابل سېند اوبه اوس له څښلو وتلي او د ناپاکۍ له امله د دې اوبو په اړه د بېلا بېلو ناروغیو اندیښنې موجودې دي.
دوی وايې، دې سېند ته اوس مهال د ښار ناپاکې او د کورونو د تشنابونو اوبه ور سمې شوې چې ورسره يې د دې سېند اوبه ناپاکې کړي او له استفادې وتلي.
د جلال اباد ښار یو تن اوسېدونکی بختور شاه وايي:« هره ورځ دغه اوبه د خرابېدو په حال کې دي، هغه بله ورځ ما ولیده یوه څوزکۍ راغله او مړه چرګان یې سیند ته غورځول، هیڅ په دې فکر کې نه وو چې، دې نه خو خلکو ته ناروغیانې پیدا کړي.»
د جلال اباد ښار یو بل اوسېدونکی وثیق الله وايي:« داخو عامه شتمني ده او له دې اوبو څخه ډیر خلک ګټه اخلي او خلکو ته له دې نه مختلف امراض انتقالیږي له دې سربیره که اوبه خیرنې شي او بیا فصلونو ته لاړې شي نو د هغه فصلونو د خرابیدو امکان هم شته.»
ځینې نور بیا وايي، د یاد سیند د اوبوککړتیا او بد بوی له امله خلک اوس د دې سېند اوبو غاړې ته له سیل پاتې دي.
د جلال اباد ښار یو تن اوسېدونکی دلاور وايي:« ډېر په تشویش کې یو او له دې امله چې دلته بویونه دي او د دې اوبو له لاسه خلکو ناروغ شوې. دا اوبه ډېرې صفا اوبه وې له کابل نه به چې خلک دلته راتلل دلته به ناست وو، خوراک او څښاک به یې کول، اوس ډېرې خرابې شوي د تشنابونو په وجه باندې خلکو ورته نلونه راسپړلي او د دې په وجه خلکو ته نن ډېر غټ تکلیف دی او خلک پر ناروغیو اخته شوې.»
د جلال اباد ښار اوسېدونکی شیر محمد بیا په دې اړه وايي:« د اختر په ورځو کې له کندهار، هلمند، زابل او نورو ځایونو خلک راغلي وو داسې بویونه وو چې دلته یې کثافات اچولي. زموږ غوښتنه له ښاروالۍ داده چې د دې ډېران غم هم وخوري او د سېند هم، ځکه ورځ تر بلې ککړیږي.»
د چاپیریال ساتنې ادارې مسولین وايې، یاده برخه کې پر عامه پوهاوي سربېره له هټېوالو یې ژمنې اخیستې چې کثافت به له ټاکلیو سیمو پرته روانو اوبو ته نه غورځوي، خو دې برخه کې يې د خلکو همکاري هم مهمه بللې.
د ننګرهار چاپیریال ساتنې ادارې ویاند عارف الله عازم وايي:« د اوبو ککړتیا مخنیوي په موخه د کابل سېند شاوخوا چې کوم هوټلونه دي د ننګرهار چاپیریال ساتنې ریاست تخنیکي ټیم له لوري هغوی ته توصیه شوې او ژمن لیکونه ترې اخیستل شوي، ترڅو د هوټلونو کثافات، فاضلات سېند ته خطا نه کړي، څاګانې جوړې کړي چې فاضلات په معیاري ډول په کې تخیله کړي، د کابل سیند ککړتیا مخنیوي په موخه د دغه سیند په مسیر مېشتو ولسونو ته عامه پوهاوی ورکول شوی ترڅو اوبه ککړې نه کړي، همدارنګه په ښوونځیو او پوهنتونونو کې او هم د ټولنیزو رسنیو له لارې عامه پوهای ترسره شوی.»
دا یوازې د کابل سېند اوبه نه دی چې ښاریان يې له ناپاکۍ شکایتونه کوي، بلکې په له همدې سېند را بیل شوې نهر اوبه هم د ښاریانو په خبره ناپاکې دي او هیله لري، اړونده ادارې به دې برخه هم پاملرنه ډېره کړي.
