د ننګرهار ولایت مرکز جلال اباد ښار چې اوس مهال په کې ګڼه ګوڼه او ټرافیکي بې نظمي د پخوا پرتله ډېره ده، ښاریان یې لامل د ښار تنګوالی او د سړکونو کموالی په ګوته کوي.
جلال اباد ښاریان وايي، که څه هم مسوولینو شاخوا درې کاله وړاندې د خلکو ستونزو د هواري په موخه د ښار حلقوي سړک د دویمې لیکې د چارو پیلولو ژمنه کړې وه او د سیند په مسیر کې یې یو شمېر ودانۍ هم په همدې موخه ونړولې، خو تر اوسه یې د چارو د عملي پیل څرک نه لیدل کېږي.
د جلال اباد ښار یو تن اوسېدونکی لونګ وايي: « د دې سړک لپاره یې څو کلي وران کړل، دا حلقوي سړک دی او موږ ډېر ورته خوشاله وو. دا سړک له ځنګل باغ څ تر ثمرخېلو پورې جوړېږي . د سړک سروې وشي، خو د کار پیلولو درک یې نه لګي. د سړک لپاره یې دغو کلیو کې دوه درې سوه کورونه ونړول، خلک بې کوره شول، خو سړک جوړ نه شو.»
د جلال اباد ښار یو بل اوسېدونکی ګربت وايي: « په هر ځای کې دومره بیروبار دی چې د پښو اېښودلو ځای نه شته. د دې سړک نقشه او نور کارونه ټول بشپړ شوي، خو عملي کار یې نه پیل کېږي. همدارنګه پاس پر چهل مټره سړک دومره ګڼه ګوڼه ده چې هره ورځ په کې ټرافیکي پېښې رامنځته کېږي.»
د ښاریانو ټینګار دا دی چې مسوولین دې د دغه سړک چارې ژر تر ژره پیل کړي، ترڅو ورسره په ښار کې شته ګڼه ګوڼه کمه او ټرافیکي نظم رامنځته شي.
د جلال اباد اوسېدونکی لونګ وايي: « ژمی تر نورو فصلونو ډېر بیروبار وي، ځکه له نورستان او نورو سړو سیمو خلک دلته راځي. که دا سړک ورغول شي، په ښار کې به ګڼه ګوڼه او فشار کم شي.»
د جلا آباد اوسېدونکی مبین وايي: « له اسلامي امارت غوښتنه کوو د ښار ګڼه ګوڼې کمولو لپاره په دې سړک کارونه ژر پیل کړي، ترڅو بیروبار کم شي.»
د ننګرهار ولایتي چارواکي وايي، اوس مهال تخنیکي ټیمونه د دې سړک د تثبیت پر چارو بوخت دي او د دې پړاو تر بشپړېدو وروسته به یې د جوړېدو عملي چارې پیل شي.
د ننګرهار د والي مرستیال مولوي عزیزالله مصطفی وايي: « دا سړک له جنګل باغ پيل کېږي تر ثمرخېلو پورې په ډبل بڼه جوړېږي. دا مهال یې په مسیر ټاکلو باندې کار روان دی او راتلونکي کې به بودیجه ورته ځانګړې شي. دا سړک به انشالله په اساسي ډول جوړېږي او د ښار ګڼه ګوڼه به هم ورسره ختمه شي.»
د جلالاباد اوسېدونکي په دې باور دي، که دا سړک جوړ شي، نو په ښار کې به اوسنۍ ګڼه ګوڼه تر ډېره بریده راکمه او ټرافیکي نظم به پلی شي.
