شاخوا یونیم کال وړاندې د ننګرهار ولایت امنیې قوماندانۍ د ښار په مختلفو واټونو کې د جنايي جرمونو د مخنیوي په موخه امنیتي کمرې ځای پر ځای کړې، خو اوس ښاریان وايي دغه کېمرې غیر فعالې شوې دي.
د جلال اباد ښار یو تن اوسیدونکی انعام الله وايي:« د چوکونو دغه کمرې چې مخکې فعالې وې نو هغه سیمه کې به چې کوم جرم ترسره کېده هغه به یې په ښه شکل اخیسته. دغه کېمرې د ښار په امنیت کې مهم رول لوبوي او دغه کمرې اوس ډېری یې غیر فعالې شوې دي.»
د جلال اباد ښار یوبل اوسېدونکی عبدالله بیا وايي:« کومې کمرې چې دې چوکونو کې لګیدلي، ا ډېری اوس غیر فعالې دي. غوښتنه مو داده چې دا باید فعاله شي او نورو چوکونو کې هم ولګیږي ترڅو جنايي جرمونه راکم شي.»
ښاریان غوښتنه کوي چې غیر فعال کمرې دې بېرته فعاله او هغو سیمو کې چې دغو امنیتی کمرو ته اړتیا ده ، نوې کیمرې ځای پر ځای کړي.
د جلال اباد ښار اوسېدونکی عزیز الله وايي:« دا کمرې خو زموږ د عام ولسو لپاره لګیدلي دي ترڅو جنايي جرمونه ورباندې کم شي. له اسلامي امارت مو غوښتنه داده چې دغه شان کمرې په هر چوک کې ولګوي ترڅو جنايي جرمونه کم شي.»
د جلال اباد ښار اوسېدونکی عنایت الرحمن وايي:« اوس هم غلاګانې کیږي، مبایلونه وهل کیږي. له حکومته مو دغه غوښتنه ده چې مخنیوی یې وشي او کمرې فعاله شي.»
بلخوا د ننګرهار امنیې قوماندانۍ مسوولین وايي، دغه موضوع یې له لوړو پوړو چارواکو سره شریکه کړې او په خبره یې پلان شته چې غیر فعالې کمرې فعالې او د اړتیا له مخې په نویو سیمو کې هم کمرې نصب کړي.
د ننګرهار امنیې قوماندانۍ امنیتي چارو مرستیال مولوي محمد طاهر مبارز وايي:« دا موضوع مو له وزارت سره شریک کړې او وزارت له موږ سره دا وعده کړې او منظوري به یې هم نن او سبا کې انشا الله راځي. په ټول ننګرهار ولایت او مربوطاتو کې به امنیتي کېمرې لګول کیږي، مصارف به یې هم د اسلامي نظام پر غاړه باندې وي او کنټرول به یې هم د اسلامي نظام پر غاړه باندې وي، نو بیا به انشا الله هېڅوک هم نه شي کولی جرم وکړي. موږ تاسو ټولو هېوادوالو ته ډاډ درکوو او په دې موږ خوښ یو چې دا د اسلامي نظام له ادرسه ولګول شي.»
امنیتي کمرې د مرکز کابل په ګډون د هېواد په لویو ښارونو کې د جنايې پیښو د مخنیوي لپاره کارول کېږي چې د خلکو په باور که یادې برخې ته توجه ډېره او د ښار په هره سیمه کې ورته اقدامات ترسره شي، شونې ده چې جنايي او نورې ورته پیښې ورسره ختمې شي.
