د عامې روغتيا وزير د روغتيا سکټور پياوړتيا لپاره هند د پاکستان ښه او غوره بديل ګڼي او زياتوي چې د هند په اړه يې نظر له دې امله مثبت دی چې د دې هېواد درمل باکيفيته او د روغتيا برخه کې پراخې تجربې لري.
نورجلال جلالي دا څرګندونې له شمشاد سره ځانګړې مرکه کې کړې او زياتوي چې د هند همکاريو له پيل وړاندې، د افغانستان درملو بازار ۷۰ سلنه پر پاکستاني درملو تکيه لرله او يوازې ۳۰ سلنه درمل له هند، ترکيې، بنګلهدېش او ازبېکستان څخه واردېدل.
د عامې روغتیا وزیر نور جلال جلالي وايي: « د درملو برخه کې۶۰ تر۷۰ سلنو موږ پر پاکستان متکي وو. زموږ مارکېټونو ته د پاکستان درمل راتلل، ۳۰ سلنه درمل له هندوستان، بنګله دېش، ایران، ترکیې او ازبېکستان څخه راتلل؛ موږ لازمه وګڼه چې هندوستان د پاکستان په ځای ښه بدیل کېدلی شي، ځکه هندوستان د درملو په برخه کې د سیمې په کچه ډېر پرمختللی هېواد دی.»
ډاکټران بیا وايي، هند په سیمه کې یوازینی هېواد دی چې روغتیايي سکټور یې په عصري ټکنالوژۍ سنبال او د درملو کيفيت يې لوړ دی.
دوی وايي، د روغتیا په برخه کې له کابل سره د نوي ډيلي مرستې او همکارۍ به ډېرې اغېزناکې وي او افغانان به له دې وروسته باکیفیته درملو ته لاسرسی ولري.
د داخله ناروغیو متخصص عبدالحق قاضي زاده وايي: « که چېرې هند د زړه له تله مرسته وکړي، هم د کادري کسانو ارتقاء، ظرفیت لوړونې او دغه ډول د درملو په برخه کې ډېرڅه کولی شي. دوی باید دلته د درملو تولیدي کارخونې فعالې کړي او دا به زموږ لپاره فوق العاده مثبت اغېز به ولري.»
د افغانستان په بازارونو کې د درملو بیو لوړېدو په تړاو د عامې روغتیا وزیر په خپلو څرګندونو کې وايي، په مارکېټ کې کافي اندازه درمل شته او دامهال له هېڅ ډول کمښت سره مخ نه دی، خو په خبره يې، د درملو واردوونکو له لوري احتکار د درملو د بیو لوړېدو لامل شوی.
جلالي دغه راز وايي، ممکن په اوږدمهاله کې د درملو کمښت ستونزه رامنځته شي، خو په وینا یې د مخنیوي لپاره يې سر له اوسه هڅې پیل شوې او په همدې موخه ځینو هېوادونو ته سفرونه هم شوي.
د عامې روغتیا وزیر نور جلال جلالي وايي: « تر ډېره حده په مارکېټ کې درمل شته، مګر ځینې تاجران احتکار کوي چې دا کار د شریعت او عرف له مخې منع دی. دا مهال درمل شته، خو په اوږدمهال کې اړتیا پېښېږي، د هغې لپاره مو هند ته سفر وکړ. زموږ د خوړو او درملو معین ایران ته هم سفر وکړ او د نورو سفرونو اراده هم لرو. د هېواد دننه کورني تولیدات هم لرو، هڅه کوو چې هغه تقویه کړو. په لومړي ګام کې به له داخلي درملواستفاده وشي او بیا نورې باکیفیته او په مناسب قېمت له هندوستان او نورو هېوادونو څخه وارد کړو. هیله شته چې دا تشه هم ډکه شي.»
دعامې روغتیا وزارت معلومات ښيي چې په کور دننه د درملو تولیدولو هڅې هم زياتې شوي او په دې برخه کې پر کورنيو پانګوالو سربېره، هند هم پراخې پانګونې ته لېوالتيا ښودلې ده.
