د جرمني رسنیو د راپورونو له مخې، د دې هېواد حکومت سه شنبه د دویم ځل لپاره شاوخوا۳۰ تنه افغان کډوال افغانستان ته راستانه کړي دي.
راپورونو کې راغلي، په دغو کسانو کې پر جرمي قضیو تورن، د لنډ مهاله مېشتېدنې پناه غوښتونکي او هغه افغانان شامل دي چې د پناه غوښتنې قانوني پروسه یې لغو شوې ده.
راپورونه دغه راز لیکلي، که څه هم د جرمني حکومت په جرمي قضیو کې د ښکېلو او یا د هغو افغانانو چې د پناه غوښتنې اسناد یې رد شوي، د ایستلو یو ټاکل شوی مهالوېش نه دی اعلان کړی، خو یو شمېر راپورونه شته چې له اسلامي امارت سره پر همغږۍ به د جرمني حکومت هره میاشت درې ځلې په الوتکو کې دا ډول افغانان اخراجوي.
د جرمني ټازـ ډي ورځپاڼې په خپل راپور کې لیکلي: « د جرمني حکومت او طالبانو ترمنځ د جون په میاشت کې د شړلو د هوکړې له تازه کېدو وروسته، اوس په میاشت کې تر درېیو پورې دا ډول الوتنې ترسره کېدای شي.»
جرمني رسنیو دا هم ویلي چې په جولای کې د دې هېواد فډرالي حکومت هغه محدودیت لغو کړ چې له مخې یې یوازې په جرمونو کې ښکېل افغانان او هغه کسان چې د امنیت لپاره خطرناک بلل کېدل، افغانستان ته به یې ستنوي بلکې اوس نور افغانان هم اخراجېدای شي.
د کډوالو د حقونو فعال عبدالرازق عدیل وايي: « که چېرې جرمني له فردي ارزونې پرته یوازې د پناه غوښتنې رد کېدو یا هم د جرم ترسره کولو له امله، ځینې کسان افغانستان ته ستنوي، دغه ګام د جرمنې او د اروپايي ټولنې له ژمنو سره ټکر لري.»
له جرمني څخه د نورو افغان کډوالو اخراج د دې هېواد له لایپیزیک هاله هوايي ډګر څخه شوی. له دې وړاندې په اپریل او جون میاشتو کې هم له دې هېواده یو شمېر هغه افغانان چې په جرمي قضیو کې تورن پېژندل شوي وو، افغانستان ته انتقال شول.
د یادونې وړ ده چې د اسلامي امارت یو پنځه کسیزه پلاوی د روان کال د جون په ۲۳ مه د بلجیم بروکسل ښار ته لاړ، ترڅو د اروپايي ټولنې له استازو سره د کډوالو پر موجوده ستونزو او اخراج خبرې وکړي.
