جاپان، افغانستان کې پر کانونو پانګونې ته لېوالتیا ښودلې.
جاپان د افغانستان پرکانونو پانګونې ته د خپل هېواد لېوالتیا وښوده.
شینزو ابې نن له ولسمشر غني سره د خبرو په مهال وویل، د افغانستان د کانونو د قوانینو معیاري کول د کانونو د استخراج او انکشاف په برخه کې لویه لاسته راوړنه ده.
شینزو ابې وویل، هېواد یې په مختلفو په ځانګړي ډول د ظرفیت لوړولو او سواد زده کړو په برخو کې د افغانستان د پراختیا لپاره خپلو مرستو ته دوام ورکوي.
د جاپان لومړي وزیر همداراز وویل، هیواد یې د سولې د هغې پروسې ملاتړ کوي چې د افغان حکومت او خلکو په رهبرۍ پرمخ یووړل شي او په دې برخه کې جاپان همکاریو ته اماده دی.
ولسمشر غني بیا د جاپان مرستې مهمې یادې کړې او ویې ویل، په بیلا بیلو برخو کې د جاپان مرستې د پرمختګ لامل شوي او په اغیزناک ډول له دغو مرستو ګټه اخیستل کیږي.
ولسمشر غني ددغه سفر په لړ کې له جاپاني چارواکو غوښتي، چې د کرنې ، اوبو مدیریت، ښاري پراختیا، د ځمکو د ثبت، د ځنګلونو د احیا او کانونو په برخو کې له افغانستان سره خپلې تجربې شریکي کړي.
ولسمشر غني نن د جاپان د نړیوالو همکاریو ادارې له مشر شینیجي کیتاوکا سره د لیدنې په مهال وویل د کرنې د ودې او د اوبو د مدیریت په برخو کې د جاپان تجربې د هغو سلګونو بندونو د جوړولو په برخه کې چې حکومت ورباندې کار کوي، ګټورې ثابتېدلی شي.
ولسمشر غني وویل، د غیر پلاني ساحو د اصلاح، د پلان پر اساس د ښاري پراختیا او په ځانګړي ډول د هغو پنځو لویو ښارونو لپاره به چې انکشاف ته چمتو دي، د جاپان د ښاري پراختیا له تجربو ګټه واخلي.
د جاپان د بین المللي همکاریو ادارې مشر د کرنې د ودې د ځمکو د اصلاحاتو او د افغان محصلینو د روزلو په برخو کې له افغانستان سره همکاریو ته چمتووالی وښود.
