جاپان د افغانستان له ښځو څخه د مالي ملاتړ او لاسنیوي په برخه کې د ملګرو متلونو له پراختیايي پروګرام(یواېنډيپي) سره د څه کم ۶ میلیون ډالره مرستې هوکړه لاسلیک کړه.
دغه مرسته چې د جاپان د نړیوالې همکارۍ ادارې(جایکا) له لارې ترسره کېږي، د افغانستان په څلورو ولايتونو بلخ، تخار، بدخشان او پکتیکا کې له څه باندې دوه زره تنو ښځو سره د مالي ملاتړ او د وړو کاروبارونو په وده کې مرسته کوي.
د جاپان شاژردافیر له افغانانو سره د مرستو او همکاریو د دوام ترڅنګ وايي، دا پروژه به ښځو ته دوه نیم زره کاري فرصتونه ایجاد کړي او د هغوی د کورنیو د مالي ملاتړ په برخه کې به مهمه ونډه ولري.
کابل کې د جاپان سفير کنیچي ماساموتو وايي: « دا پروژه د ۵.۸۸ ميليون ډالرو په ارزښت د جاپان حکومت په مالي مرسته د جاپان د نړیوالې همکارۍ ادارې له لارې د ملګرو ملتونو پراختیايي پروګرام له لوري پلي کېږي چې له افغانانو سره زموږ ملګرتیا ښيي. د دې ترڅنګ دا پروژه د ملګرتیا له لارې، هیلو، ثبات او فرصتونو ته د رسېدو مسیر پر لور زموږ د ګډ باور ښکاروندويي هم کوي. دا پروژه مالي برخې، تشبثاتو او خوندي برخو ته د افغان ښځو لاسرسی لنډوي چې له امله به یې زرګونه ښځې او کورنۍ ترې ګټه پورته کړي.»
بل پلو، په افغانستان کې د ملګرو ملتونو پراختیايي پروګرام استازی له پرمختګونو سره سره لا هم افغانستان له اقتصادي بحران سره مخ هېواد بولي او وايي، دامهال له څلورو درې افغانان د خپلو لومړنیو اړتیاوو د پوره کولو لپاره سخته مبارزه کوي.
نوموړی په هېواد کې د ورته پروژو پیل د افغان ښځو او افغاني ټولنو د مالي ملاتړ او شخصي عوایدو ترلاسه کولو په برخه کې مهم ګام ګڼي او وايي، افغان ښځو ته د تړلو کاري دروازو په پرانیستلو کې مهم ونډه لوبولی شي.
افغانستان کې د ملګرو ملتونو پراختیايي پروګرام استازی سټېفن رودریګز وايي: « په افغانستان کې یوازې شپږ سلنه ښځې له کوره بهر کار کوي، خو دا شمېره بیا په نرانو کې ۸۵ سلنه ده. دا یوازې یوه احصائیه نه ده بلکې د وړتیاوو، عوایدو او د کورنیو او ټولنو د ظرفیت د لاسه ورکولو ښکارندویي کوي. د دې ترڅنګ، بل تریخ حقیقت دا دی چې ښځې په افغانستان کې شاته پرېښودل شوې دي. له همدې کبله دا ډول پروژې چې نن یې موږ په لاره اچوو، په دې برخه کې د ستونزو د حل لپاره ډېر د اهمیت وړ دی. دا ډول پروژې د ښځو پرمخ تړلې دروازې پرانیزي او په اقتصادي ژوند کې د ونډې اخیستو لپاره هغوی ته لازم ابزار، ملاتړ او فرصتونه په لاس ورکوي.»
د جاپان حکومت له لوري له ښځو دا مالي ملاتړ داسې مهال دی چې له دې وړاندې هم د جاپان د نړیوالې همکارۍ ادارې له خوا د افغانستان د ښځمنو خصوصي سکټور د ودې په موخه مرستې شوې دي.
