سږ کال د سعودي عربستان له لوري افغانستان ته د ۳۰ زره حاجیانو سهمیه ورکړل شوې ده چې د حج فریضې ادا کولو په موخه به حرمینو ته ځي.
د حج ارشادو او اقافو وزارت سرپرست نور محمد ثاقب وايي، دغه حاجیان به په افغانستان کې له څلورو زونونو کندهار، کابل، هرات او بلخه د سعودي عربستان پر لوري وخوځېږي او لومړی پرواز به یې د غبرګولي یا جوزا میاشتې په ۱۸ نېټه ترسره شي.
دغه راز ثاقب وايي، د حج دغه ۳۰ زره کسیزه سهمیه یې د افغانستان د ولسونو ترمنځ په عادلانه توګه وېشلې او ښايي ۸ زره یې یوازې مېرمنې وي چې د حج فریضې ادا کولو لپاره به بیت الله شریف ته ولاړې شي.
ثاقب زیاتوي: « له سعودي عربستانه د افغانستان لپاره۳۰ زره د حج سهمیه اخېستل شوې او په مکرر او جدي ډول د زیاتوالي غوښتنه شوې ده، یعنې ۳۰ زره خو تثبیت دي؛ خو موږ بیا بیا له دوی د زیاتوالي غوښتنه کړې ده.»
د حج عمرې او زیارتونو عمومي رئیس عطاالله خادم وايي: « د نوي ثبت نام له مخې ۳۸۴۳ کسان په نظر کې نیول شوي، دوی ثبت نام کړی او د قرعه کشۍ له لارې تنظیم شوي دي. د مجاهدینو لپاره ۳۹۴۱ کسان په نظر کې نیول شوي چې دا هم د قرعه کشۍ له لارې تنظیم شوي دي. همداراز د شهیدانو وارثینو، معلولینو او له هېواده بهر کډوالو ته هم سهم په نظر کې نیول شوی، ۸۰۰۰ ښځینه چې د افغانستان د حج په سهمیه کې پخوا هم تللې او اوس به هم وي، ان شاءالله دا ټول تنظیم شوي دي او چارې یې روانې دي.»
د یاد وزارت سرپرست نورمحمد ثاقب وايي، هغه افغان زایرین چې سږکال بیت الله ته د حج په موخه ځي د هر یوه لګښت یې څه باندې ۳۸۶۵ امریکايي ډالره دی؛ خو د اهل تشیع د زایرینو لګښت به ۵۰ ډالره تر دې زیات وي.
ثاقب زیاتوي: « د راتلونکي حج د هر یو تن حاجي ټول لګښت ۳۸۶۵ ډالره او ۹۸ سنټه دی، البته د اهل تشیع حاجیانو لپاره د ۵۰ ډالرو په توپیر سره، یعنې د اهل تشیع د هر یو تن حاجي ټول لګښت به ۳۹۱۵ ډالر او ۹۸ سنټه وي.»
ثاقب د حج مراسمو له ټولو ګډون کوونکو وغوښتل چې د خپلې داخلې لګښت حکومت ته وسپاري.
نوموړی وايي، دا ځل یې په افغانستان او سعودي عربستان کې افغان حاجیانو لپاره ځانګړې اسانتیاوې برابرې کړي چې دوی به ترې برخمن وي او د تېرکال په څېر به مدینه منوره کې هم ورته درې وخته ډوډۍ برابره کړي.
