د ارشاد، حج او او قافو وزارت وایي، روان کال۳۰ زره افغان حاجیان د حج فریضې اداء کولو په موخه سعودي عربستان ته تللي و چې د هرحاجي لګښت ۲۶۶ زره ۴۰۰ افغانۍ محاسبه شوی و، خو د دغو مراسمو په پای کې څرګنده شوه چې د هرحاجي له لګښت څه باندې درې زره افغانۍ اضافه شوې دي.
د ارشاد، حج او قافو وزیر وايي، په ټولیز ډول د ۳۰ زره افغان حاجیانو د حج لګښت څه باندې ۷ میلیارده ۷۲۳ میلیونه افغانۍ شوی چې د حاجیانو له ټولو تحویل شویو پیسو څخه څه باندې ۹۴ میلیونه ۵۰۰ زره افغانۍ اضافه شوې دي چې په شفافه توګه به بېرته حاجيانو ته ورکړل شي.
د ارشاد، حج او اوقافو وزیر شیخ نور محمد ثاقب وايي: « له محترمو حاجیانو څخه ټولې ۷ میلیارده، ۸۱۸ میلیونه، ۳۰۷ زره او ۲۰۰ افغانۍ راټولې شوې وې. په دې کې د هر حاجي لګښت ۲۶۶ زره ۴۰۰ افغانۍ و. په حج کې ټولې مصرف شوې پیسې ۷ میلیارده، ۷۲۳ میلیونه، ۷۴۱ زره، ۵۸۳ افغانۍ مصرف شوې دي.»
د یاد وزارت چارواکي وايي، د دوی د محاسبې له مخې، د دغو څه باندې ۹۴ میلیونه او پنځه سوه زره اضافه شویو افغانیو څخه هر حاجي ته ۳ زره۲۲۳ افغانۍ ورسیږي او حاجيان کولی شي خپلې اضافه شوې پیسې له راتلونکې شنبې په مرکز او ولایتونو کې ترلاسه کړي.
شیخ نور محمد ثاقب په دې اړه وايي: « د حاجیانو له مجموعي راجمع شویو پیسو څخه ۹۴ میلیونه، ۵۶۵ زره ۶۱۶ افغانۍ پاتې دي. زموږ له دقیقې محاسبې وروسته هر حاجي ته ۳ زره ۲۲۲ افغانۍ بېرته ورکول کېږي.»
په ورته مهال، چارواکي د روان کال د حج فریضې پرمهال د ۱۹ تنو افغان حاجیانو د مړینې خبر ورکوي او وايي، یاد حاجیان په طبیعي مرګ مړه شوي دي.
د یاد وزارت د حج، عمرې او زیارتونو رییس وايي، درې نور افغان حاجیان بیا د ناروغۍ له امله په سعودي عربستان کې تر درملنې لاندې دي چې اوس یې روغتیايي وضیعت ښه دی او ژر به هېواد ته را ستانه شي.
محمد نبي محمدي وايي: « زموږ د حاجیانو په مرګ ژوبله کې کال په کابل کمښت راځي، ځکه چې دوی ته هر څه سم برابر شوي دي. موږ د سږ کال په حج کې ۱۹ تنه وفات شوي حاجیان لرل چې ټول یې په طبیعي مرګ مړه شوي دي.»
هرکال افغانستان ته د سعودي عربستان له لوري د حج فریضې اداء کولو په برخه کې شاوخوا۳۰ زره حاجیانو سهمیه ورکول کیږي، خو چارواکي وايي هڅې یې پیل کړې دي چې د افغانستان د حاجیانو سهمیه نوره هم زیاته کړي.
