Skip to content
افغانستان ته د نړیوالو بشري مرستو د رالېږلو په لړ کې دا ځل ترکیې د ۴۰ زره ډالرو په ارزښت د ۳۳ ټنه خوراکي توکو بشري مرسته وکړه.
دغه مرستې په ۲ زره کوچینو کارتونونو کې بسته بندي شوي، په هر کارتن کې ۸ قلمه بېلا بېل توکي یو ځای شوي او د سرې میاشتې ټولنې ته وسپارل شول.
د سرې میاشتې ټولنې مشر سید صفت الله قریشي وايي:« له ۱۹ تر ۲۵ میلیونه انسانان دلته وږي دي. تاسې له موږ سره مرستې وکړئ. موږ به یې د ژمي تر را رسېدو وړاندې د افغانستان ټولو برخو ته ورسوو. موږ ډاډ در کوو،چې شفافیت به وي، تاسې یې څارنه وکړئ.»
د افغانستان اسلامي امارت له ترکیې او نورو هېوادونو غوښتنه کوي،چې له افغانستان سره بشري مرستو ته دوام ورکړي.
په کابل کې د ترکیې سفیر جهاد ایرګین ای وایي، پر دې سربېره به نورې بشري مرستې هم وکړي او هوډ لري،چې د ژمي په را رسېدو سره به ژمنۍ مرستې هم وکړي.
ایرګین وايي، د سرې میاشتې په وسیله به له افغانانو سره د نورو بنسټونو له خوا هم مرستې ووېشي.
ایرګین زیاته کړه:« ترکیه د خپلو نورو غیر حکومتي بنسټونو له خوا هم له افغانانو سره مرستې کوي او د ژمي په را رسېدو سره به ژمنۍ مرستې هم وکړو.»
افغانان له ټولو هغو هېوادونو مننه کوي،چې په سخت وضعیت کې د دوی لاسنیوی کوي، خو غوښتنه یې دا ده،چې اسلامي امارت دې په رسمیت وپېژني او پر افغانستان دې اقتصادي ترهګرۍ نه تحمیل کوي.
