نشه يي توکي، هغه ناوړه پدیده چې نه یوازې انساني ژوند ګواښي بلکې ټولنه بدناموي او بېلابېلې ناخوالې زېږوي.
د تخار ولایت امنیه قومندانۍ له نشه يي توکو سره د مبارزې مدیریت ګړندیو هڅو په پایله زیاته اندازه هغه نشه يي توکي کشف شوي چې له بدخشان او نورو ولایتونو را لېږدول شوي وو.
مسوولین وایي، د دې زرګونه کلیوګرامه توکو قاچاق او کارونې په تور۱۵۰ تنه نیول شوي او د قانون منګلو ته سپارل شوي دي.
قاري ذبیح الله هجران وايي: « د تخار ولایت امنیه قوماندانۍ له نشه يي توکو سره د مبارزې مدیریت په مرکز تالقانو او ۱۶ ولسوالیو کې د کره او کشفي عملیاتو په پایله کې، د نشه يي توکو د قاچاق، پلور او کارولو په تړاو ۱۵۰ تنه نیولي دي. له نیول شویو کسانو څخه ۲۳۰۰ کیلوګرامه بېلابېل نشه يي توکي لکه تریاک، چرس او هیرویین نیول شوي. همدارنګه ۵ ټابېلټونه او ۱۵۲ لېټره الکولي مشروبات هم کشف او نیول شوي.»
په ورته مهال، د تخار امنیه قومندانۍ مسوولین بیا په دې ولایت کې د جنایي جرمونو په تړاو هم د لسګونه کسانو نیول کېدو خبر ورکوي.
د دوی په خبره، د کال له پیل راهیسې د غلا، اختطاف، اخلاقي فساد او ورته نورو قضیو کې شاوخوا ۲۵۰ تورن کسان د قانون منګولوته سپارل شوي.
د تخار ولایت امنیت امر مولوی عبدالقدیر زاهد وايي: « د جنايي جرمونو په تور مو تر اوسه شاوخوا ۲۵۰ کسان نیولي. دغه کسان د غلا، جنسي اړیکو، خپل منځي شخړو او په چاقو وهلو تورونو له امله نیول شوي.»
د تالقان اوسېدونکي د حکومتي ادارو او امنیتي اورګانونو له هڅو ستاینه کوي او وایي، کولی شي تر لرې پرتو ولسوالیو او سیمو پرته له کوم امنیتي ګواښه لاړ شي. دوی ټینګار کوي چې د امنیت لا ټینګښت کې دې مسوولین جدي و اوسي.
د تخار اوسېدونکی عبدالفتاح وايي: « زه د اشکمش اوسېدونکی یم، له دې ځایه ځم او راځم، په ټوله لار کې خیر او خیریت دی. موږ له شته امنیت ډېر خوښ یو، خدای وکړي له دې هم ښه شي.»
د تخار اوسېدونکی خالد وايي: « له دې وړاندې جنايي جرمونه وو، خو اوس صفر ته ښکته شوي. همدارنګه امنیت هم په مرکز او هم ولسوالیو کې ټینګ دی او څه خاص خبره نه شته.»
په شاوخوا ۵ زره جرېبه ځمکو د کرل شویو کوکنارو له منځه وړل، د ۱۷۰ معتادینو درملنه او ۳۲۵ تنه نارینه او ښځینه سوالګرو ته هره میاشت د پنځه زره افغانیو معاش ورکول بیا د تخار ولایت امنیه قومندانۍ له نشه يي توکو سره مبارزې مدیریت له نورو لاسته راوړنو بلل کېږي.
