د پاکستان په کراچۍ ښار کې د افغانستان جنرال کونسل عبدالجبار تخاري وایي، د یوې افغان مېرمنې او د هغې د درېیو ماشومانو د مړینې پېښه چې د ډسمبر په ۲۸مه نېټه خپل کور کې په زندۍ شوي حالت کې موندل شوي وو، په ټول جدیت سره تعقیبوي.
عبدالجبار تخاري رسنیو ته په استول شوي ویډیویي پیغام کې ویلي، که څه هم د مقتول له کورنۍ څخه دوی ته چا مراجعه نه ده کړې؛ خو دوی بیا هم له خپله اړخه د کراچۍ له پولیسو سره یو ځای پر څېړنو بوخت دي.
نوموړی زیاتوي، د دې مېرمنې او د هغې د درېیو ماشومانو مړي د عدلي څېړنو لپاره روغتون ته لېږدول شوي.
عبدالجبار تخاري دغه راز وايي، د وژل شوې افغان مېرمنې او ماشومانو د وژنې په تور د هغې پاکستانی مېړه او زوی د پولیسو له خوا نیول شوي دي.
