وروسته له هغې چې د ډونالډ ټرمپ پر مشرۍ د امریکا نوي حکومت کار پیل کړ، د افغانستان په تړاو یې لهجه تونده شوه او ضد او نقض څرګندونې کوي.
د امریکا نوې اداره کله د باګرام هوايي اډې او کله هم په افغانستان کې د پاتې امریکايي وسلو د بېرته اخیستلو خبرې کوي.
خو د سیاسي چارو تحلیل کوونکي وايي، سره له دې چې امریکا اوس له افغانستان سره په جګړه کې نه ده، خو د کابل پر وړاندې یې ستراتیژي د جګړې مهال ده.
د دوی په اند، امریکا باید د افغانستان پر وړاندې خپلې ستراتیژۍ ته بدلون ورکړي او د تقابل پر ځای د تعامل لار غوره کړي.
دوی زیاتوي، د امریکا نوي حکومت ته په کار ده چې د افغان ولس د میلیاردونو ډالرو کنګل شوې شتمنۍ آزاده کړي، په تورو لېستونو له سره غور وکړي او د رسمیت پېژندنې په موضوع بحث ته کېني.
د سياسي چارو تحلیل کوونکی هاشم الکوزی وايي: « موږ پر امریکایانو، د هغوی پر ولسمشر او بهرنیو چار وزیر غږ کوو چې تاسو اوس هم داسې څرګندونې کوئ لکه افغانستان سره چې جګړه کې ښکېل یاست یا هم دلته نظامي حضور لرئ. زه وایم تاسو اوس جګړه بایللې ده، له افغانستانه وتلي یاست او باید له افغانستان سره تعامل ولرئ او د افغان ولس هغه ل۱۰ میلیارد ډالرو د خوشې کولو په اړه د افغانستان له نظام سره خبرې وکړئ چې تاسو برمته کړي دي. همدارنګه باید د افغانستان د رسمیت پېژندلو په اړه خبرې وکړئ او زموږ د اسلامي نظام د مشرانو له تور لېست ایستلو په اړه خبرې وکړئ.»
خو ځینې نور بیا وايي، د افغانستان جیوپولوټیک موقیعت دا ایجابوي چې د سیمې ترڅنګ له امریکا او نورې غربي نړۍ سره هم مثبت تعامل ولري.
دوی په دې باور دي چې سیاست نه دایمي دوست لري او نه هم دایمي دوښمن او پر همدې اساس باید له هېوادونو سره د خپلو ګټو پربنسټ اړیکې ټینګې شي.
د سياسي چارو تحلیل کوونکی شهزاده مسعود وايي: « موږ په یوه داسې جغرافیه کې موقعیت لرو چې ناګزیره یو هم د سیمې له هېوادونو سره، هم د امریکا له متحده ایالتونو او غربي نړۍ سره د مثبت تعامل له لارې اړیکې ولرو؛ ځکه په سیاست کې دایمي دوستي هم نه وي او دایمي دوښمن هم نه وي. زما په اند، د تعامل لاره خپلول نه یوازې د افغانستان پر ګټه دي بلکې د غربي نړۍ او په ځانګړې توګه د امریکا پر ګټه هم ده.»
د سیاسي چارو تحلیل کوونکی توریالی ځاځی بیا په دې اند دی چې له نورو تمه درلودل تاریخي تېروتنه ده او افغانان باید پرخپل ځان اتکا وکړي.
د ځاځي په خبره، تېرو څلور لسیزو تجربو دا وښوده چې د امریکا په شمول د نړۍ ګڼ شمېرهېوادونه له افغانستان سره ریښتینې نه دي.
هغه زیاتوي:« اوس هغه وخت را رسېدلی چې افغانان پر خپلو پښو ودرېږي، په خپلو مټو اتکا وکړي او له پردیو تمه او توقع کول پرېږدي. که داسې کېږي، دا به ډېره لویه تاریخي تېروتنه وي.»
اسلامي امارت بیا له وړاندې ویلي، له هېڅ هېواد سره ستونزه نه لري، له ټولو سره نږدې او د متقابل درناوي پر بنسټ ولاړې اړیکې غواړي او ډاډ ورکوي چې له افغانستانه به هېڅ هېواد ته ګواښ پېښ نه شي.
