د سیاسي چارو تحلیل کوونکي وايي، په ګاونډ او سیمه کې د امریکامتحده ایالتو او روسیې وروستي سیاستونه د افغانستان لپاره ګواښوونکي دي او له منفي اغیزو یې د افغانستان ساتنې لپاره پر بې پرې سیاست وکارول شي.
دوی وايي، هغه مهال به کابل د واشنګټن او مسکو د وروستیو سیاستونو له اغیزو په امن وي،چې کابل منځ لاری سیاست غوره کړي او دا هغه مهال کیدای شي،چې افغانستان یو ځل بیا خپل پخوانی نړیوال حیثیت ترلاسه کړي.
د سیاسي چارو تحلیل کوونکی طارق فرهادي وايي:« غوره شکل د دې لپاره،چې افغانستان د روسیې او امریکا متحده ایالتو له سیاستونو په امن کې وي دادی،چې یو میانه روه سیاست ولري. دا کار افغانستان هغه مهال کولای شي،چې یو قوي ، مشروع او نړۍ ته داحترام وړ حکومت ولري.»
ځیني نور بیا وايي، په سیمه کې د امریکامتحده ایالتو او روسیې وروستیو سیاستونو ښه فرصت هم رامنځ ته کړی او په دې شرایطو کې د افغانستان متوازن سیاست کولای شي،چې له دواړو ګټه پورته کړي او دې موخې ته د رسیدو لپاره مسلکي تګلارې جوړښت ته اړتیا ده.
د سیاسي چاروتحلیل کوونکی عزیز معارج وايي:« که موږ وکولای شو،چې ښه مدیریت وکړو او متوازنه سیاست غوره کړو،دا د افغانستان لپاره یو ښه فرصت دی،چې کولای شي، له شرق او غربه ګټه پورته کړي او دا نه شو کولی،نو باید داسې سیاست غوره شي،چې نور افغانستان د دوی د ګټو قرباني نه شي او د دې لپاره افغانستان ته قوي پالیسي په کار ده.»
د سیاسي چارو تحلیل کوونکی حکمت الله حکمت بیا وايي، افغانستان ته په کار ده،چې ټولو خواوو ته د هغوی د ګټو ساتلو ډاډ ورکړي او د یوه ځانګړي بهرني سیاست پر مټ خپلې ملي ګټې خوندي کړي.
حکمت ټېنګار وکړ،چې د افغانستان دولت دې متوازن بهرنی سیاست غوره کړي او خپله خپلواکي او بې طرفي باید وساتي.
هغه زیاته کړه:« افغانستان ته په کار ده،چې په دغسې سیاستونو باندې د ټولې نړۍ اقتصادي سیاسي او ډیپلوماتیک ملاتړ خپل کړي،باید خپله بې طرفي له ټولو سره نیک مناسبات هر لوري ته د هغوی د ګټو ساتلو او د خپلو ګټو منلو سیاست خپل کړي.»
په دې وروستیو کې د امریکامتحده ایالتو او روسیې په سیمه کې رقابتي سیاستونه پیل کړي، د روسیې ولسمشر ولادیمیر پوتین ایران ته سفر درلود،چې د ریپوټونو له مخې هڅه کوي، د اسلامي نړۍ ملاتړ ترلاسه کړي او همدا راز امریکايي ولسمشر جوبایډن له اسرائیلو وروسته سعودي عربستان ته پر سفر وتلی دی،چې دغو سیالیو ته د ټولې سیمه او نړۍ پام وراوښتی او له نږدې یې څاري.
