د اسلامي امارت په راتګ سره ټول پخواني چارواکي او سیاسیون اروپايي او نورو هېوادونو ته لاړل او افغانستان یې پریښود.
له هېواده وتلي دغه پخواني چارواکي او سیاسیون دا ځل د اتریش په ویانا ښار کې سره راټول شوي او یو شخصي څیړنیز مرکز ودانۍ کې یې ناسته جوړه کړې.
د سیاسي چارو یو شمېر تحلیل کوونکي وايي، دغه ناسته غیر رسمي ده او ګډونوال یې د کوم هېواد او یا هم د کوم رسمي سازمان له لوري نه دي بلل شوي.
دوی په دې باور دي،چې دغه ډول ناستې د افغانستان پر روان وضعیت هېڅ ډول اغیز نه شي کولی او نه هم له دغې ناستې کومه هېله مندي کیدای شي.
د سیاسي چارو تحلیل کوونکی سرور نیازی وايي:« د ویانا غونډه یوه غیر رسمي غونډه ده،چې د هېڅ نړیوال سازمان او هېواد له لوري نه ده رابلل شوې. دا د افغانستان پر وضعیت هېڅ ډول مثبت یا منفي تاثر نه شي لرلی او نه هم ورته کومه هېله مندي شته.»
ځینې نور بیا وايي، د ویانا په ناسته کې تکراري او افغانانو ته تجربه شوې څيرې راټولې شوي او ناسته یې کومه پایله نه ورکوي.
د سیاسي چارو تحلیل کوونکی قریب الرحمان شهاب وايي:« زه فکر کوم،چې دغه ناسته به هېڅ ګټه ونه لري او دا هغه تکراري څیرې دي،چې دلته راټولې شوي دي او پخوا افغانانو تجربه کړي دي او له ناستې یې هېڅ تمه نه شي کیدای.»
خو د پوهنتون استاد فیض محمد ځلاند بیا له هېواده بهر دغه ډول ناستې د سیاسي حل لپاره ګټورې ګڼي، چې په وینا یې نوره جګړه د حل لار نه ده او افغانان باید خپلې ستونزې د خپل منځیو ناستو له لارې حل کړي.
ځلاند زیاته کړې:« د ویانا ناسته او ورته ټولې هغه ناستې،چې په بهر کې ترسره کیږي،دا ښه ګامونه دي،ځکه جګړه د حل لار نه ده او افغانان باید د خبرو اترو له لارې خپل منځي ستونزې حل کړي.»
په ټوله کې د ویانا په ناسته کې دوه غوښتنې مطرح شوي، له نړیوالو غوښتل شوي،چې پر برحاله افغان چارواکو بندیزونه زیات کړي او همدا راز د دغې ناستې ګډونوالو ځان ته د افغانستان حکومت د سیاسي اپوزیسیون خطاب هم وکړ او هېله یې داوه،چې باید په همدې توګه ومنل شي.
