Skip to content
د سیاسي چارو تحلیل کوونکي وايي، هغو هېوادونو چې د اسلامي امارت له راتګ سره یې په کابل کې سفارتونه تړلي وو او اوس یې بېرته پرانیزي،له دیپلوتیک اړخه د افغانستان پر ګټه دي.
دوی وايي، د اړیکو اصل دوه اړخېزه دی،خو په اوسنیو شرایطو کې چې افغانستان په یوه نړیواله انزوا کې دی، په کابل کې تړل شویو سفارتونو بیا پرانیسته اړین کار دی،خو په راتلونکي کې باید دغه هېوادونه د افغانستان سفارتونه هم په خپله خاوره کې ومني.
تحلیل کوونکی حکمت الله حکمت وايي:« د نړیوالو اړیکو اصل دا دی،چې دا اړیکې باید دوه طرفه وي،د حکومتونو پر کچه د ملتونو پر کچه باندې، د اوس لپاره افغانستان اړتیا لري،چې د نړۍ ځېنې هېوادونه خپلې استازولۍ په کابل کې پرانیزي او فعالیت شروع کړي،خو په راتلونکي کې هېله داده،چې افغان لوری د دې جوګه شي،چې خپلې سیاسي نماینده ګۍ په دغو هېوادونو کې فعاله کړي،ترڅو افغانستان نړیوال مشروعیت ترلاسه کړي.»
پرون یو شمېر عربي رسنیو راپور ورکړی،چې د سعودي چارواکو پرېکړه کړې،چې په کابل کې یو ځل بیا خپل سیاسي دفتر پرانیزي او په نږدې راتلونکي کې به پرې اقدام وکړي یو شمېر نور تحلیل کوونکي بیا په دې باوردي،چې د سفارتونو یو اړخېزه پرانېسته د رسمیت پیژندنې په مانا نه ده او دغه هېوادونه په افغانستان کې خپلې موخې لري او د افغانستان د وضعیت ارزونې او څار په موخه خپلې سیاسي استازولۍ پرانیزي.
تحلیل کوونکی عزیز معارج وايي:«د بهرنیو سفارتونو بیا پرانېستل په کابل کې به دې مانا نه دي،چې افغانستان دوی په رسمیت پیژني او یا هم دلته قوي دیپلوماتیکې اړیکې موجودې دي دا یواړخیزې اړیکې دي. دوي یوازې د خپلو اهدافو لپاره چې له اوضاع ځان خبر کړي او په مسایلو کې د خیل واوسي،خپل سفارتونه په کابل کې پرانیزي،خو یوه امیدواري یې داده،چې په راتلونکې دوی افغانستان یوازې نه پریږدي او ان یې په رسمیت پیژني.»
د اسلامي امارت مرستیال ویاند انعام الله سمنګاني وايي، د یپلوماتیکو اړیکو لمن یې دپراخیدو په حال کې ده او په کابل کې دتړل شویو سفارتونو دپرله پسې بیا پرانیسته له نړۍ سره دسیاسي اړیکو دټینګښت ښه پیلامه ده.
سمنګاني زیاته کړه:«له نړۍ سره د افغانستان دیپلوماتیک روابط د هرې ورځې په تیرېدو سره ښه او پراخه کېږي. همدا اوس دیارلس هېوادونه په مستقیم ډول افغانستان کې دیپلوماتیک حضور لري او سفارتونه او استازولۍ یې فعالې دي او ځينې مهم عربي او اروپايي هېوادونه چمتوالي نیسي،چې له افغانستان سره خپلې دیپلوماتیکې اړیکې له سره پیل کړي.اسلامي امارت د دیپلوماتیکو اړیکو دغه پراختیا د افغانتسان او نړۍ ترمنځ د رسمي تعامل د پیل لپاره ښه پیلامه ګڼي.»
دوه ورځې وړاندې متحده عربي اماراتو هم په کابل کې خپله سیاسي نماینده ګۍ پرانیسته، چې له دې سره دیارلس هېوادونه په کابل کې سفارتونه لري او فعالیت کوي.
